Galaxy Note 7 эгаларига Samsung жуда катта мукофот ҳозирлади
2016 йилда Galaxy Note 7 харид қилиб, кўп ўтмасдан аккумулятор носозлиги боис юзага келган ёнғин туфайли уйғонган ваҳималарга қарамасдан уни компанияга қайтармаган харидорлар учун Samsung кутилмаган мукофот ҳозирлади. Компаниянинг маълум қилишича, улар Galaxy Note 8 фаблети харид қилиш истагини билдирсалар, компания бу ишқибозларга $425 долларгача чегирма беради.
6,3 дюймли Quad HD+ (2960 x 1440 белги) экранга эга Galaxy Note 8 бугун Нью-Йоркда тақдим қилинди. Фаблет ўзининг жиҳатларига кўра, айни пайтда энг кучли смартфонлардан бири экани эътироф этилмоқда.
Унинг тақдимоти чоғида Samsung компанияси томонидан Galaxy Note 7 эгаларига оммавий равишда чегирма эълон қилиниши, айни пайтда Galaxy Note 7'дан фойдаланаётганлар эски фаблетни $425 доллар баҳосида тақдим қилишлари мумкинлиги эълон қилинган. Бу пул Galaxy Note 8'нинг нархидан айириб ташланади.
Айни пайтда халқаро смартфон етказиб берувчи компаниялар Galaxy Note 8 фаблетига $930 дан $960 долларгача бўлган нарх белгилашган. Samsung аввалдан буюртмаларни 24 августдан қабул қилади ва 15 сентябрдан етказиб бера бошлайди.
Samsung 2016 йилнинг сентябрида 3 миллион дона Note 7 смартфонидан сотган ва техник муаммолар сабаб уларнинг бир қисмини қайтариб олишга эришган. Бу модел компанияга 5 млрд доллар зарар келтирган. Компания расман баёнот берган бўлса ҳам, бир гуруҳ фойдаланувчилар смартфонни қайтариб беришмаган.
Тақдимот чоғида Samsung раҳбарияти бренднинг ашаддий мухлисларига алоҳида миннатдорчилик изҳор қилганлар.
"Note мухлисларига шахсан ташаккуримни айтиш мен учун шараф. Мен сизнинг садоқатингиз олдида бошим ерга теккунигача таъзим қиламан", дейди компаниянинг мобил бўлинмаси раҳбари Dj Koh.
