Galaxy S8: iPhone 7’дан устун 6 технология, аммо сотиб олмаслик учун 5 сабаб
Смартфон маркетингининг моҳир “ўйинчи”ларидан бири бўлган Samsung янги флагман смартфонини “Infinity Display”, яъни “тугманмас дисплей” лақаби билан 29 март куни оммага тақдим қилди. Девайс бозорда Apple, LG, Huawei’нинг смартфонлари билан жиддий “кураш”га киришади. Айниқса, iPhone 7 ҳамда iPhone 7 Plus ҳозирча Samsung Galaxy S8’нинг кучли рақиби. Ҳозир сизга бу рақиблар ўртасидаги тафовут ва жиҳатларни баён қиламиз.
1. Super AMOLED дисплей панели 4K сиғимли, яъни ундаги пикселлар сиғими 1440х2960 белгига тенг, Бу эса ёрқин ва тасвир деталлари аниқ-тиниқ намойиш бўлади, дегани. Шунингдек Corning Gorilla Glass 5 ҳимоя шишаси билан ҳимояланган. Бўйига нисбатан смартфоннинг экран улуши 83.6%ни ташкил қилади. iPhone 7’да эса экран улуши анча паст, 65.6%. Унинг пиксел сиғими ҳам жуда паст, яъни 1,334 х 750, Plus талқинида эса 1,920 га 1,080.
2. Samsung Galaxy S8 ва Galaxy S8+ учун фойдаланувчи қиёфасини таниш технологияси муҳим жиҳат. Бу унинг хавфсизлигини таъминлаш учун айни муддао. Бироқ, бу сенсорнинг сурат ёрдамида ҳам шахсни тасдиқлаши, фойдаланувчининг фотосуратини кўрсатса ҳам, смарфтон дарров блокировкадан чиқиши – катта шов-шувга сабаб бўлди. Умид қиламизки, Samsung бу муаммони илованинг янги талқинида бартараф қилади.
Apple iPhone 7 ҳамда iPhone 7 Plus ҳам бу жиҳатга эга эмас. Улар ўз хавфсизликларини таъминлашда ҳозирча бармоқ излари сканерига суянишади.
3. Samsung Galaxy S8/Galaxy S8+ девайслари Gigabit LTE, яъни секундига 1000 МБ маълумот ўтказиш технологияси билан таъминланган жаҳондаги илк смартфонлардир. Бунда Qualcomm Snapdragon 835 процессорининг юқори тезликни қўллаб-қувватлайдиган X16 LTE модемининг ўрни муҳим. Samsung’нинг Exynos 8895 процессори ҳам Gigabit LTE’ни қўллаб-қувватлайди. Apple iPhone 7 ва 7 Plus эса LTE тармоғида секундига 450 МБ маълумот ўтказиш имкониятига эга.
4. Янги Galaxy S8 туркумидаги смартфонлар Bluetooth 5.0. стандартига эга жаҳондаги илк мобил алоқа воситаларидир. Бу симсиз технология смартфонга бир вақтнинг ўзида 2 жуфт симсиз аудио қулоқчинни қўллаб-қувватлаш имконини беради. Bluetooth v5.0 технологияси айни пайтдаги талқиндан жуда тезкор ва қамров диапазони ҳам кенг. Apple iPhone 7 ҳамда iPhone 7 Plus эса Bluetooth 4.2 талқинида ишлайди.
5. Симсиз қувватлаш технологияси Samsung смартфонлари учун янгилик эмас. Зеро, компаниянинг Galaxy S7 девайси ҳам бу жиҳатга эга. Apple iPhone 7 ҳамда iPhone 7 Plus’да ҳаттоки тезкор қувватлаш технологиясининг йўқлиги ачинарли.
6. Apple смартфон савдоси ёки маркетингида ўзининг кучли процессорлари билан доим пешқадам бўлган. Аммо, Galaxy S8 ҳамда S8+ орқали Samsung “Олма”ни бу масалада ортда қолдирган кўринади. Американинг Qualcomm Snapdragon 835 ҳамда компаниянинг Exynos 8895 процессорларининг техник ишлаш жараёни 10 нанометрни ташкил қилади ва самарадорлик бўйича Apple процессорларидан ортда қолмайди.
Излаган имкон топар, деганларидек Samsung Galaxy S8’ни сотиб олмаслик учун ҳам бемалол сабаблар топиш мумкин
- Батарея ҳали ишончдан ўтгани йўқ
2016 йилги Galaxy Note7’нинг оммавий ёниб кетишидан ҳафсаласи пир бўлган фойдаланувчилар Samsung бу гал ҳам “портловчи” смартфон тайёрлаган бўлса-я, деган хавотирда юришибди. Лекин, Samsung – бу Samsung. Таъзим қилиб, барчадан узр сўраган компания хатони қайта такрорламайди, деган умиддамиз.
- Бармоқ излари сканерининг орқага кўчгани – катта дидсизлик
Home тугмасидан воз кечиб, Samsung бармоқ изи сканерини орқага, бош камеранинг ёнига жойлаштирди. Эксперталрнинг фикрича, бу смартфондаги эстетик мутаносибликка жиддий зарар етказган. Айниқса, камерани бармоқда тозалашни хуш кўрувчилар учун сканер ноқулай тугма бўлиб қолади. Nexus ва Pixel каби уни камерадан узоғроққа жойлаштириш ҳам мумкин эди.
- Мўрт корпус
Сўзсизки, Galaxy S8 – смартфон бозорининг нафис ва хушбичим алоқа воситаси. Аммо, бу гўзаллик нохос қўлдан тушиб кетиб, дарз кетган корпусга қараб, кўнгилдан нималар ўтишини ўйланг. Минг долларлик телефон-а! iPhone 4 билан боғлиқ шикоятларни ҳали унутганимиз йўқ. Apple мўрт корпус муаммосини алюминий корпус орқали ҳал қилган эди. Сўнг бошқалар ҳам шу технологияни татбиқ қила бошлади.
Galaxy S8 корпусини ҳимоя қилишнинг энг яхши йўли ҳимоя шишасидан фойдаланиш. Лекин ҳозирча бундай шиша бозорда йўқ. Чехол шундай гўзалликни ўраб қўя қолади. Хуллас, агар сиз эҳтиёткор одам бўлсангиз, Galaxy S8 харид қилинг.
- TouchWiz – Samsung’нинг энг кўп танқид остига олинадиган Android талқини. Samsung ушбу Galaxy S8 ва S8+ ҳам шу эътирозли операцион тизимга эга. Тўғри, жуда ёмон эмас. Афсуски, Bixby овозли ёрдамчиси ва кучли иловаларни яратаётган Samsung компанияси Pixel смартфонидаги каби, битта яхши операцион тизим яратса зўр бўларди.
- iPhone 8 — кутишга муносиб
iPhone 7 – кучли процессор ва самарали дастурий платформага эга флагман. Аммо, сентябрда тақдим қилиниши кутилаётган, айфон моделининг 10 йиллик юбилейига тўёна сифатида ишлаб чиқариладиган iPhone 8’нинг Galaxy S8’дан ҳам илғорроқ бўлиши маълум қилинган.
Гувоҳи бўлганингиздек, ҳеч нарса тугал ёки мукаммал эмас. Жумладан, 1000 долларлик гелексининг ҳам яхши ва заиф жиҳатлари бор. Лекин, хулосани биз эмас, сиз чиқарасиз.
