Google компанияси Yahoo веб-бизнесига қизиқмоқда
Bloomberg манбасининг ахборот манбасига таяниб хабар қилишича, Alphabet холдинги таркибига кирувчи Google компанияси Yahoo веб-бизнесини сотиб олиш бўйича таклиф билан чиқишга ҳозирлик кўрмоқда. Ариза топширишнинг энг сўнгги муддати 11 апрелда якунига етиши эълон қилинган бўлса ҳам, мазкур масаладан бохабар ахборот манбаси маълумотига кўра, Yahoo аризаларнинг биринчи раунди учун муддатни бир ҳафта – 18 апрелга қадар узайтирган.
Интернет-гиганти веб-активларига Verizon телекоммуникация оператори ҳам эга чиқиш талабида. Компания келгуси ҳафтада мазкур таклиф билан чиқмоқчи. Таклифга “маза” киритиш учун Verizon Yahoo Japan Corp акцияларини сотиш олишга тайёр эканлигини билдирди.
Ўзларининг кимлигини сир тутишга қарор қилган Bloomberg ахборот манбаларининг маълумотларига кўра, AT&T, Comcast ва Microsoft сингари харидорлар Yahoo шу йилнинг февралида эълон қилган аукционда иштирок этмайди. Time Inc. компанияси таклифлар қийматини баҳолашда давом этаётган бўлса, Bain ва TPG инвестицион жамғармалари аукционда ё мустақил, ёки стратегик харидор кўмаги билан қатнашишга қарор қилган.
Бундан аввалроқ эса Google, Microsoft, Yahoo, Comcast ва LinkedIn компаниялари электрон почтанинг янги механизмини яратиш учун бирлашгани хабар қилинган эди. Янги механизм бўйича барча хат-хабарлар шифрланган ҳолда юборилади.
