Инновацион супурги яратилди – энди хокандознинг кераги йўқ!
KickStarter краудфандинг платформасида уй тозаловчи универсал жиҳоз пайдо бўлди. Бу – супуриб йиғилган чангларни сўриб ҳам олувчи супургидир.
ЎҚИНГ: Келинларга ажойиб совға: робот-чангютгич Xiaomi Mi Robot Vacuum
Vabroom деб аталувчи мазкур мослама ташқи кўринишидан замонавий супургилардан айтарли фарқ қилмайди, лекин унда хона супураётганда хокандоз зарур бўлмайди. Чунки ушбу инновацион супурги ичида кичкина моторчаси бўлиб, махсус трубкага уланган. Битта тугмачани босиш билан бу трубка худди мини-чангютгич каби ишлай бошлайди.
Янгича супурги ёрдамида чангларни полда бир жойга йиғиб, чангютгич трубачаси орқали ўзидаги махсус кичкина контейнерга сўрдириб олинади. Кейин эса уни яна битта тугмачасини босиш орқали чиқиндилар челакчасига бўшатиш керак.
Тўғри, Vabroom барибир тўлақонли чангютгич ўрнини боса олмайди, лекин полга бирор нима сочилганида, кичкинароқ тозалаш ишларида у жуда қўл келади. Бундан ташқари, инновацион супурги аккумулятордан қувват олиб, умуман шовқинсиз ишлайди.
Ушбу жиҳоз учун KickStarter’да 35 доллар эвазига олдиндан буюртма бериш мумкин. Буюртмачиларга уни шу йилнинг октябрида етказиб беришни ваъда қилишяпти.
ЎҚИНГ: Чангюткич харид қилишда нималарга эътибор бериш керак?
