Келажак смартфони намойиш этилди

Илгарилари смартфонлар бир-биридан кучли фарқ қилган бўлса, кейинги пайтларда уларнинг ташқи кўриниши нисбатан бир хиллашиб бораётганини сезгандирсиз? Шунинг учунми, дизайнерлар Филип Старк ва Жером Оливье тақдим этган келажак смартфони концепти умуман бошқача. Alo деб номланувчи бу қурилма биз кўникиб қолган «плитка»лардан тубдан фарқ қилади.

Alo ўзига хос, футуристик материаллардан тайёрланган «аждаҳо тиши» шаклида. Тасвирни у ўз экранида эмас, балки голограмма тарзида ҳавога йўналтириб акс эттиради. Шундай экан, анъанавий – рангли катта экранга энди ҳожат қолмайди.

Келажак смартфони овоз орқали бошқарилади ва у кишини юзидан таний оладиган бўлади.

Alo’нинг корпуси эластик бўлиб, ярим шаффоф материалдан қилинган. Унинг электрон таркибий қисмлари эса алюминийдан ясалган ядрога жойлаштирилган.

Биз ўрганиб қолган тугмачалар ҳам унда бўлмайди. Бирор матнни ёзиш учун энди электрон ёки механик тугмачалар орқали ҳарфлаб териш эмас, балки уни айтиб туриш керак бўлади – смартфон сизнинг гапингизни матн тарзида тайёрлаб беради.

Яна Alo уч ўлчамли голограммалар ярата олади; бу – видео, суратлар ва бошқа график маҳсулотларни томоша қилишнинг янгича услубидир.

Фойдаланувчи билан алоқани у вибрациялар ва ҳарорат ўзгариши ёрдамида амалга оширади.

Дарвоқе, смартфоннинг механик шикастланишидан энди чўчимаса ҳам бўлади – Alo’нинг юзаси шундай материалдан ишланадики, сал тирналиш ёки жиддийроқ шикастланишдан сўнг у ўзини ўзи тиклаб олади.

Филип Старк бу концептни серияли тарзда ишлаб чиқаришга жорий этмоқчи эканлигини айтган. Аммо бунинг қачон имкони бўлиши борасида ҳозирча ҳеч ким бир нима дея олмайди.