Microsoft компанияси Surface Mini борлигини тасдиқлади
Microsoft компанияси бир неча йиллардан буён Surface гибридлари, яъни ажраладиган дисплейли Surface Book ноутбуклари ва Surface Pro планшетларини ишлаб чиқармоқда. Surface Mini ихчам гаджети ҳақидаги гаплар эса ҳанузгача ўз тасдиғини топгани йўқ эди. Энди эса компания ҳақиқатдан ҳам қурилманинг ихчам варианти мавжудлигини маълум қилди.
Microsoft компанияси вице-президенти Панос Панай (Panos Panay) компаниянинг анъанавий тақдимот маросимида Surface тоифасидаги ишланмалар, жумладан, Surface Mini борасида интервью берди. Унинг тасдиқлашича, чиндан ҳам ихчам 7 дюймли Surface Mini бор ва мазкур гаджет машҳур Moleskine блокнотига ўхшайди. Айтиш керакки, мулозимнинг нутқи 2013 йилдаги каби хаяжонли бўлди. Бироқ, аҳамиятлиси, у лойиҳа ҳақида ўтган замонда гапирди. Бу эса Панайнинг кундалик фаолиятидан Surface Mini аллақачон чиқиб кетганини ва компания мазкур лойиҳани яқин йилларда ишлаб чиқаришга жорий қилмаслигини англатади.
Эслатиб ўтамиз, компания 2014 йилги молиявий ҳисобот чоғида “бундай турдаги форм-фактор қурилмасини ишлаб чиқармаслик ҳақида қарор қабул қилинган”ини билдирганди.
Миш-мишларга кўра, ихчам модел Surface Pro 3 билан бирга тақдим этилиши керак бўлган, аммо маросимга бир соат қолганда лойиҳа анонси бекор қилинган.
Хуллас, компания ҳозир бу турдаги жажи планшетлар ишлаб чиқаришда бирор маъно кўрмаяпти, шекилли.
