Нега самолёт салонига гаджетларни олиб чиқиш тақиқланмоқда?
АҚШ президенти Доналд Трамп маъмурияти мамлакатга Европадан келадиган самолёт салонларига ноутбук ҳамда бошқа электрон қурилмаларни олиб чиқишни тақиқлашни режалаштирмоқда.
2017 йилнинг мартида худди шундай тақиқ Яқин Шарқ мамлакатларидан учиб келаётган самолётларга нисбатан татбиқ қилинган эди. Яъни, 21 мартдан сўнг тўғридан-тўғри бу мамлакатлардан учиб келаётган пассажирларнинг самолётга смартфон ва саломатлик учун зарур қурилмалардан ташқари, барча турдаги электрон воситаларни бортга ўзлари билан олиб чиқишларига чек қўйилди.
Бу орқали АҚШ электрон қурилмалар орқали портловчи воситаларни олиб ўтишга уринмоқчи бўлган террористларнинг жиноятларига чек қўйишни режа қилган. АҚШ Ички хавфсизлик масалалар бўйича вазирликнинг маълум қилишича, террорчи жангарилар зўравонликнинг “инновацион усули”дан, яъни бомба ва бошқа портловчи моддаларни ноутбукларга яшириб самолётга олиб чиқишга уриниб, терактлар содир этишлари мумкин.
АҚШ Ички хавфсизлик масалалар бўйича вазирлик матбуот котиби Жиллиан Кристенсенга кўра, АҚШ ҳукумат мамлакат осойишталигига хавф солаётган таҳдидларни ҳисобга олган ҳолда хавфсизликни таъминлаш чораларини кўрмоқда.
АҚШдан сўнг Буюк Британия ҳам Яқин Шарқнинг 6 та давлати, аниқроғи Туркия, Ливан, Иордания, Миср, Тунис ҳамда Саудия Арабистонидан тўғридан-тўғри учиб келадиган йўловчиларга самолёт бортига ноутбук ва бошқа электрон қурилмаларни олиб чиқишни тақиқлади.
