Note 9 кутилган муҳим жиҳатга эга бўлмайди
Инсайдерлар томонидан тарқатилган маълумотларга кўра, Samsung Galaxy Note 9 смартфони тақдимотига қадар 2 ой вақт қолган. Бу фаблет шу йилнинг июль ойи сўнггида ёки август ойида тақдим қилинади. Кореялик ишлаб чиқарувчи уни имкон қадар тезроқ тақдим қилиб, бозорга чиқаришга уринмоқда. Боиси сентябрда Apple ҳам янги девайсларни тақдим қилади. Қолаверса, шу кунларда смартфон бозорида Galaxy S9 ҳамда S9+ моделларига бўлган талаб тушиб кетган.
Камерадаги янгиланишларни ҳисобга олмаганда, Galaxy S9 ва S9+ смартфонлари бирор бир ўзига хос жиҳатга эга бўлмаган. Galaxy Note 9 модели шунинг учун ҳам катта ўзгаришларга эга бўлиши ҳозирдан айтиб келинмоқда.
Бироқ куни кеча маълум бўлган хабарга кўра, Samsung бу гал ҳам миллионлаб фанатларини хурсанд қила олмаслиги мумкин. Кореянинг таниқли нашрларидан бири бўлган Chosun тарқатган хабарга кўра, Samsung Galaxy Note 9 узоқ кутилган янги бир жиҳатдан маҳрум бўлади – экранга жойлаштирилган бармоқ изи сканери. Бу гал ҳам кореялик гигант сканерни Galaxy Note 8 каби, орқа панелга жойлаштириб қўяди.
Шу билан бирга, манбанинг маълум қилишича, Samsung Galaxy Note 9 тақдимоти августнинг иккинчи ярмида бўлиб ўтади. Журналистларнинг ёзишларича, Жанубий кореялик корпорация аллақачон флагманнинг илк партиясини тайёрлаб қўйган.
Гарчи, Samsung дисплей сканери технологиясида ҳам муваффақиятга эришган бўлса-да, ҳозирча у бу йўналишда илк жиддий қадамни ташлай олмайди. Сабаби, бу билан смартфон нархи қимматлашиб кетиши билан бирга, ҳозирча бу технология ўзини оқлагани йўқ.
Экспертларга кўра, Galaxy S10 модели бундай илғор сканерга эга бўлади. Унгача эса Samsung виртуал сканерни такомиллаштириб, таннархини ҳам туширишга эришади. Galaxy Note 9 фаблетида 3 карралик яқинлаштириш функцияси бўлади.
