Samsung ArtPC Pulse – футуристик компьютер

Ўтган ҳафтада Жанубий Кореянинг Samsung компанияси ArtPC Pulse номли янги дизайндаги компьютерни тақдим қилди. Бу ҳақда MSpoweruser нашри хабар қилган.

Янги гаджет  бироз Apple Mac Pro моделини ёдга солади. Лекин бу Samsung “олма”дан нусха кўчирган дегани эмас. Сабаби қурилмалар ўртасидаги фарқ яққол кўзга ташланиб туради. Думалоқ корпусга эга ArtPC Pulse альюминийдан ишланган бўлиб, иккита қисмлан ташкил топган. Қурилманинг қуйи қисмида аппарат модули жойлашган, устки қисмда эса Harman/Kardon русумидаги 360 градусли динамик ўрин олган. Улар ўзаро турли рангларда ёритиладиган мослама орқали бирлаштирилган.

Гаджет олтинчи авлод Intel Core процессорида ишлайди, унга DDR4 стандартидаги 16 ГБ тезкор хотира ва 256 ГБ NVMe SSD ўрнатилган. Қаттиқ дискдаги хотира ҳажми 1 ТБдан иборат.

Қурилма 4К видео учун H.265 аппарат дискомпрессиясини қўллаб-қувватлайди. Орқа тарафда 4 та USB порт, битта USB Type-C порти, Ethernet, HDMI, кардридер ва аудиослот мавжуд.

Samsung ArtPC Pulse компьютерини Amazon ресурсида 1200 долларга харид қилиш мумкин.