Samsung Galaxy S7 ҳамда LG G5 смартфонлари бир кунда тақдим қилинади
2016 йилнинг 22-25 февраль кунлари Испаниянинг Барселона шаҳрида бўлиб ўтадиган Жаҳон Мобиль Конгресси муносабати билан мазкур ойнинг мобиль алоқа воситалари ишлаб чиқарувчи халқаро компанияларнинг янгиликларига бой бўлиши кутилмоқда.
Samsung’нинг Android қурилмалари учун Интернет браузерининг реклама ва контентни таъқиқлаш функциясига эга янги талқини, Google’нинг қуёшдан қувват олиб ишлайдиган дронлар ёрдамида 5G алоқа технологияси, Google Fiber компанияси томонидан кенг полосали интернет тармоқларига мўлжалланган, Google Voice’га ўхшаган овозли хат юбориш технологияси ва бошқа янгиликларнинг намойиши кутилмоқда.
Аммо, Android ихлосмандлари катта қизиқиш билан кутаётган, бир-бирига рақобатчи сифатида қайд этилаётган Samsung Galaxy S7 ҳамда LG G5 смартфонлари ҳам 22 февраль куни фойдаланувчилар диққатига расман ҳавола қилинади.
Фикр-мулоҳазаларга кўра, рақобат масаласида Galaxy S7 2,560 x 1,440 пиксель сиғимига эга 5.1 дюймли дисплейи билан 5.5 ёки 5.6 дюймли, 4K технологиясига асосланган, 3,840 x 2,160 пиксель сиғимига эга дисплейли LG G5’га ютқазиб қўйиши ҳам мумкин.
Анъанавий ўтказиб келинадиган, мобиль саноати компанияларини тақдимот, семинар ва дастурчилар иштирокидаги семинарлар, саноатнинг энг яхши вакиллари тақдирланадиган тадбирлар атрофига тўплайдиган анжуман доирасида ташкил этиладиган, 2100 та компания иштирок этадиган, 98 минг квадрат метр майдонни эгаллайдиган кўргазмада жаҳоннинг кўплаб давлатларидан 100 мингга яқин иштирокчининг ташриф буюриши кутилмоқда.
