“Сичқонча” учун ғайриоддий гиламча сотувга чиқмоқда

Швейцариянинг Logitech компанияси компьютер “сичқонча”сига мўлжалланган Powerplay деб номланувчи илғор гиламчани намойиш қилди. Бу аксессуар компютернинг симсиз “сичқонча”сини қувватлайвериб чарчаган фойдаланувчилар учун. Яъни, компания тақдим қилган Powerplay электрон гиламчаси энди “сичқонча”дан фойдаланиш чоғида уни қувватлайди ҳам.

Янги технологияда гиламчанинг юзаси тўлиқ қувват бериш модулига айлантирилган. Қувват бериш жараёнида электрон гиламчанинг ўзи электр таъминотига уланган бўлиши керак.

Logitech вакилининг маълум қилишича, Powerplay гиламчаси 4 йиллик изланишлар самарасидир. Бундай илғор гиламчаларнинг илк модели Logitech G Powerplay деб номланган. Унинг майдони — 275 мм x 320 мм.га тенг. “Сичқонча” унинг хоҳлаган қисмидан қувват олади. Бу гаджет август ойидан $100 баҳосида сотувга чиқади.

Аммо, Powerplay аксессуари ҳозирча фақатгина ўзи учун ишлаб чиқарилган махсус “сичқонча”ни қувватлайди. Powerplay технологияси келажакда такомиллаштирилиб, ундан кейинчалик смартфонларни қувватлашда ҳам фойдаланилиши мумкин.