Смартфонлар “электрон уйқусизлик”ни келтириб чиқармоқда
Яқинда Буюк Британияда ўтказилган тадқиқотлар натижасида мобил телефонлар “электрон уйқусизлик”ка сабаб бўлаётгани аниқланган. Telegraf нашрининг ёзишича, Британияда истиқомат қиладиган мактаб ёшидаги болаларнинг 45 фоизи мана шундай салбий таъсир остида экан.
Ўсмирлар билан амалга оширилган тажрибалар шуни кўрсатдики, аксарият болалар ўртача бир соат уйқуга сарфланиши керак бўлган вақтни смартфонга термулиб ўтказишмоқда. Лекин бу билан смартфоннинг таъсири чекланмаяпти: у тун давомида турли билдиришномалар, сигнал ва вибрациялар билан ўсмирларни бот-бот уйғотмоқда.
Натижада уйқудан олинадиган ҳордиқ миқдори сезиларли даражада камайиб кетмоқда. Бу эса мактаб ёшидаги болаларнинг кундузи диққатини йиғишга, дарсни ўзлаштиришига жуда салбий таъсир кўрсатиши маълум.
Британиялик олимлар ота-оналарга болалар билан смартфоннинг уйқуга кўрсатадиган салбий таъсири борасида тушунтириш ишларини олиб бориш ва ухлашдан аввал болаларнинг гаджетларини ўчиришни тавсия этишмоқда. Шунингдек, манбада келтирилган хабарга кўра, керакли миқдорда ухламайдиган одамларда ёш, тана тузилиши ва бошқа сабабларга қарамай юрак касалликлари ортиши қайд этилган.
