Смартфонлар иш самарадорлигини камайтириши тажрибаларда исботланди

Hi-tech.mail.ru нашрининг ёзишича, Ноттингем Трент ва Вюрцбург университетлари ҳамкорлигида ўтказилган тадқиқотлар смартфон ходимнинг иш самарадорлигини камайтиришини тасдиқлади.

Тажрибаларда 19-56 ёш оралиғида бўлган жами 95 та (56 нафар аёл, 39 нафар эркак) кўнгилли иштирок этган. Тажрибадан кўзланган мақсад турли шароитларда инсоннинг концентрациясини баҳолаш эди. Тадқиқот 4 та шарт бўйича ўтказилган: смартфон чўнтакда, иш столида, қутида ва хона ташқарисида жойланган. Тажрибада қатнашган кўнгиллилар иккита экранда қисқа пайт  давомида кўрсатилган ҳарфларни айтишлари керак бўлган. Смартфон қанчалик яқин турса, иштирокчилар шунчалик кўп адашишган.

Иштирокчилар стол устидаги смартфонга қараганда, уларнинг концентрацияси минимум даражада бўлган. Смартфон хонадан ташқарида бўлганда, иштирокчилар концентрацияси 26% га юқори бўлган.

Мутахассислар смартфоннинг йўқлиги иштирокчиларда хавотир уйғотмаганини таъкидлашган. Барча ҳолатларда қатнашчилар ўзларини бир хил ҳис этишган.