Snapdragon 1000'да ишлайдиган илк гаджет маълум бўлди
Мобил чип ишлаб чиқаришда жаҳонда машҳур Qualcomm компанияси Intel компаниясига қарши Snapdragon 1000 процессорини ишлаб чиқаради. Персонал ва мобил компьюерларга мўлжалланган бу техник ечим жорий йилнинг охири ёки янги йил бошида тақдим қилинади.
Бир неча кун аввал тез орада жаҳон электроника бозорида Windows 10 операцион бошқарув тизими ҳамда Snapdragon 850 процессорида ишлайдиган ноутбуклар чиқарилиши маълум бўлган эди. Snapdragon 850 жиҳатларига кўра Snapdragon 845 чипсетининг такомиллашган талқини ҳисобланади.
Манба тақдим қилган маълумотларга таянадиган бўлсак, навбатдаги кучли процессор Snapdragon 1000 деб ном олади. Ушбу процессордан Windows 10 тизимидаги компьютерларда ҳам фойдаланиш мумкин. Бир кристалли мазкур технологик тизим устида айни пайтда тажрибалар олиб борилмоқда.
Snapdragon 1000 — Qualcomm компаниясининг рақиби Intel'га қарши ишлаб чиқарган илк процессори бўлади. Гап шундаки, ҳозирча самарадорлик масаласида Qualcomm ҳали Intel учун муносиб рақиб бўладиган чипсет ишлаб чиқаришга муваффақ бўлмаган.
Ҳозирча янги чипсет тўғрисида батафсил маълумот йўқ, бироқ айрим инсайдерларнинг ёзишларича, янги чипсет 6,5 Вт кучланишидаги токда фаолият кўрсатади. Snapdragon 845 чипсетида бу кўрсаткич 5 Вт эканини ҳисобга олсак, янги процессорнинг самарадорлиги анча ошган.
Шу билан бирга, манба Qualcomm компанияси Snapdragon 1000 чипсетида ишлайдиган илк ноутбукни Asus ишлаб чиқаришини ҳам маълум қилган. Ушбу ноутбукнинг ишчи номи Primus. Унинг жорий йилнинг кузида тақдим қилиниши кутилмоқда.
2017 йилнинг декабридан бошлаб Qualcomm ҳамда ASUS, шунингдек HP брендлари Snapdragon 835 мобил чипи ва Windows 10 тизимида ишлайдиган илк ноутбукларини тақдим қилган эдилар. Улар самарадорликда ультрабуклардан қолишмайдилар.
Бундай ноутбукларнинг қувват тежамкорлиги юқори бўлгани туфайли бир марта қувватлангандан сўнг 20 соат ишлай оладилар. Шу билан бирга, бундай ноутбукларда смартфонлардаги каби кутиш режимидан тезда "уйғониш" функцияси ҳам бор. Шу кунларда бундан илҳом олган Apple ҳам мобил процессорларни ноутбукларига татбиқ қилиш устида бош қотирмоқда.
