Sony металл смартфон ва унинг “ақлли” жуфтини тақдим этади
Sony компанияси дастлабки номланиши Xperia PP10 бўлган ўтган йилги Z5 флагманининг яхшиланган талқинини тақдим этади. Унга ўз синфида энг кичик ҳисобланган Smart Ear – “ақлли” гарнитураси ҳамроҳлиқ килиши мумкин.
Sony компаниясининг тақдимоти Mobile World Congress 2016 маросимининг биринчи куни – 22 февралда ўтказилиши режалаштирилган. Бироқ интернетда компания янги маҳсулотлари ҳақидаги маълумотлар тарқалиб бўлди.
Смартфон қобиғи металлдан ишланган, унинг экрани эса анъанага содиқ қолган ҳолда эгикроқ тайёрланган 2.5D шишаси билан қопланган. Интернетда тарқалган экранни блоклаш суратлари бир неча йиллардан буён кетма-кет жиддий ўзгаришга учрамаган интерфейснинг янгиланганидан далолат беради.
Гап-сўзларга кўра, янги флагман 5,2 дюймли QHD-дисплей, Snapdragon 820 процессори, 4 Гб тезкор хотира ва 23 мегапикселли асосий камера билан таъминланади.
Тақдимоти бўлиб ўтиши кутилаётган яна бир янги қурилма – “ақлли” Smart Ear гарнитурасидир. Суратлардан кўриниб турибдики, у Motorola томонидан ишлаб чиқилган Moto Hint`га жуда ўхшаш. Унинг ўз тоифасида энг кичиги бўлиши айтилмоқда. Гарнитурани бошқаришда товуш ва сенсор майдончасидан фойдаланиш мумкин.
