Суратдаги iPhone 8 дизайни "айфончи"ларни саросимага солмоқда
Куни кеча интернет тармоғида iPhone 8 дея тахмин қилинаётган смартфон акс этган суратлар тарқаб кетди. Айни пайтда бу суратлар боис, айфон ихлосмандлари орасида ваҳима тарқалган: бу -- улар кутаётган "мўъжизавий" айфон эмас!
Уларга ўзингиз баҳо беринг:
Маълум бўлишича, фотосурат кема қатнови орқали юк ташиш билан шуғулланадиган компаниянинг маҳсулотлар хавфсизлигини таъминлайдиган ходими томонидан олинган. Муаллифнинг сўзларига кўра, суратда iPhone 8 флагманининг олд панели акс этиб турибди. Қолаверса, булура янги айфон авлодининг тажриба моделлари эмас, оммавий ишлаб чиқарилган намуналари.
Тўғри, маълум бўлганидек,
суратда дисплей атрофи ромдан холи дизайнда ишланган смартфон тасвирланган.
Аммо, бу кутилган дизайн эмас. Жумладан, суратдаги смартфоннинг суҳбат динамиги ва камера датчиги учун олд панелнинг юқори қисмидаги катта майдондан
ўрин ажратилган. Ваҳоланки, iPhone 8'нинг экрани смартфондаги бу қисмларни "ютиб
юбориши" керак эди. Шунингдек, суратда смартфон қуйисида ҳам ҳайҳотдек майдон қолдирилган. Бу сизга ҳам LG G6'нинг қиёфасини эслатиб юборган бўлса ажаб
эмас.
Смартфон олд панелининг юқори қисмида камера датчиги битта. Инсайдерлар янги айфоннинг 2 та олд камера сенсорларига эга бўлишини ҳам ёзишаётган эди.
"Айғоқчилик" сурати билан бирга эълон қилинган хатда суратлар муаллифи йирик жўнатмаларни етказиб беришда хавфсизлик билан шуғулланишини, айни пайтда янги iPhone'нинг батареялар хавфсизлигини назорат қилиш билан бандлигини маълум қилган.
Қолаверса, сураткаш ходим Touch ID идентификация тизимининг смартфоннинг орқа панелига жойлаштирилганини айтган. Ваҳоланки, бу детал ҳам дисплей остидан ўрин эгаллаши керак эди. Шунингдек, хабарда етказиб бериш лозим бўлган янги айфонларнинг миқдори тобора кўпайиб бораётгани ҳам қайд этилган.
Инсайдерларнинг фикрича, суратлар Apple'нинг осиёлик етказиб берувчиларидан бирида ишлайдиган ходим томонидан ёки гаджетни божхона назоратидан ўтказиш чоғида олинган.
Ҳозирча бу хабарнинг тўғри ёки нотўғрилиги хусусида бирор фикр айтиш қийин. Эҳтимол, бу смартфонлар iPhone 8'нинг хитойлик "қиёфадоши" бўлиши ҳам мумкин. Нима бўлганда ҳам, Apple мухлислари компания уларни "рақиб"лар олдида уялтириб қўймаслигига ишонишмоқда.
