Xiaomi 13 Ultra илк марта расмий рендерларда кўрсатилди
Бир неча ойлик миш-мишлардан сўнг, ваниҳоят, Xiaomi 13 Ultra'нинг ташқи кўриниши, дизайни расман ошкор қилинди. Xiaomi'нинг расмий Weibo саҳифасида улашилган суратларда сиз смартфоннинг оқ рангли вариантдагисини кўришингиз мумкин.
Бир қарашда Xiaomi 13 Ultra ўтган йилги Xiaomi 12S Ultra'ни эслатиб юборади ёхуд юмалоқ камера ороли дизайни янги Ultra учун ҳам сақлаб қолинган. Рендерларда смартфоннинг ичидаги тўртта камера сенсорлари ҳам яққол кўриниб турибди.
Шунингдек, смартфон орқа томони бу сафар ҳам нанотери билан қопланган ва эҳтимол шу сабаб ҳам у ҳозирги бошқа флагманлардан сезиларли даражада қалин кўринади.
Дизайн борасида ўзгаришлар йўқ эмас: суратларда смартфон юқори ва пастки томонлари сезиларли даражада қайрилганлигини билиниб туради. Қолаверса, юмалоқ камера ороли қалинлигидан ташқари яна смартфоннинг орқа юқори қисми ҳам бироз кўтарилган.
Камера ороли марказида сиз Leica, Vario-Summicron ва айрим камера сенсори ҳақидаги ёзувларини ҳам кўришингиз мумкин.
Xiaomi 13 Ultra расман глобал бозорга 18 апрел куни тақдим қилиниши кутилмоқда.
