Xiaomi'нинг 33 та смартфонида "ақлли камера" пайдо бўлади
Бир неча кун муқаддам, аниқроғи 31 май куни Хитойнинг Xiaomi корпорацияси янги смартфонлар билан бирга, MIUI 10 операцион тизимини ҳам тақдим қилди. Мазкур операцион тизим компания смартфонларининг бошқарув тизими ҳисобланади. Кутилганидек, мазкур операцион тизимни жорий йилнинг иккинчи ярим йиллигидан эмас, балки қисқа муддатлардан сўнг смартфонларга юклаб олиш мумкин бўлади.
Омади чопган илк фойдаланувчилар шу ойдан, яъни июндан бошлаб смартфонлари тизимини MIUI 10 прошивкасининг синов талқинига янгилаб олишлари мумкин бўлади. Янги операцион тизимдаги муҳим янгиликлардан бири - унинг янги интерфейсга эга бўлганидир.
MIUI 10 операцион тизимини юклаб олгандан сўнги Xiaomi сўнгги уч йилда ишлаб чиқарган смартфонларнинг камерасида AI - "сунъий ақл" технологияси пайдо бўлади. Мазкур технология камеранинг сифатли сурат олиш имкониятларини оширади. Аҳамиятли томони шундаки, мазкур "ақлли" функция ҳам бош камера, ҳам олд камерада татбиқ қилинади.
MIUI 10 операцион тизимида бир вақтнинг ўзида бир нечта иловалардан фойдаланиш ойнаси янада такомиллашган ва қулай шаклга келтирилган. Энди унда вазифалар ёнламача эмас, тиккасига (вертикал) жойлашади.
MIUI 10 прошивкасида асосий эътибор фойдаланувчи ишора ва ҳаракатларини яхшироқ тушунишга, интерфейснинг чўзинчоқ экранга мослаштиришга қаратилган. Инновацион тизимнинг соддалаштирилгани фойдаланувчининг Xiaomi смартфонларидан осон ва тез фойдаланишларини таъминлайди.
Хитойлик корпорация бир оз эскирган смартфонларини ҳам ташлаб қўймади, яъни компаниянинг барча смартфонлари янги операцион тизимга янгиланади.
Расмий манбанинг маълумот беришича, 2018 йилнинг 1 июнидан бошлаб MIUI 10 тизимини синовдан ўтказиш бўйича ёпиқ синовлар бошланди. Жорий ойнинг якунига қадар ушбу тизим расман тақдим қилинади.
Қайси смартфонлар биринчилардан бўлиб эга бўлади?
Ушбу смартфон моделлари биринчи бўлиб янги тизимни юклаб оладилар: Mi 8, Mi MIX 2S, Mi MIX 2, Mi MIX, Mi 6X, Mi 6, Mi 5, Mi Note 2, Redmi S2 ҳамда Redmi Note 5. Уларнинг барчаси биринчи тўлқин билан инновацион функцияларга эга бўлишади.
MIUI 10 операцион тизимини Xiaomi компаниясининг бошқа смартфонларига июлнинг охирларида юклаб олиш мумкин бўлади. Янгиланишларнинг "иккинчи тўлқини"да қуйидаги телефонлар янги функцияларга эга бўлишади: Mi Note 3, Mi 5X, Mi 5c, Mi 5s, Mi 5s Plus, Mi 4, Mi 4c, Mi 4S, Mi Max 2, Mi Max, Redmi 5, Redmi 5A, Redmi 5 Plus, Redmi 4, Redmi 4A, Redmi 4X, Redmi 3S/3X, Redmi Pro, Redmi Note 5A, Redmi Note 4, Redmi Note 4X ҳамда Redmi Note 3 Pro.
Аниқроқ айтадиган бўлсак, Xiaomi сўнгги 4 йилда ишлаб чиқарган 33 та шахсий смартфонларини илғор MIUI 10 тизими билан таъминлайди. Операцион тизимнинг барқарор талқини тақдим қилинишининг аниқ санаси ҳозирча маълум қилинмаган. Аммо шу йилнинг сентябридан бошлаб жаҳон миқёсида Xiaomi компаниясининг барча фойдаланувчилари ундан баҳраманд бўлишлари мумкин.
