Xiaomi Redmi Pro 2: нархи ва сурати фош қилинди
2016 йилда Xiaomi компанияси смартфон бозорига тажриба сифатида Redmi Pro мобил алоқа телефонини чиқарган эди. Унинг ўзига хос жиҳатлари қаторига қўш сенсорли бош камерасини келтириш мумкин. Тўғри, мазкур жиҳат бугунги кун учун янгилик эмас. Аппарат корпуси металлдан тайёрланган, унинг диагонали 5.5” дюйм бўлган FullHD сиғимли (1920×1080) экрани илғор AMOLED платформасида ишлайди.
Жамоатчиликнинг диққатини тортиш ва маркетингда муваффақиятга эришиш учун Redmi Pro арзон нархга баҳоланди. Девайснинг энг арзон — Xiaomi Redmi Pro 3/32 ГБ талқини $225 доллардан сотувга чиқарилган эди. Бироқ, компаниянинг бу борадаги уринишлари зое кетди ва Xiaomi Redmi Pro тарихи тез якунига етган.
Xiaomi Redmi
Аммо хитойлик брендларнинг ўзига хослиги бор — улар маркетингда ўжар, яъни бошлаган ишларининг камчиликларини аниқлаб, ишга бошқатдан киришишга ҳафсала топа олишади. Шу нуқтаи назардан. Xiaomi ҳам айни пайтда Redmi Pro’га муносиб “меросхўр” тайёрламоқда. Айни пайтда компания ижтимоий тармоқларда Xiaomi Redmi Pro деб номланган янги смартфонига “Helio P25” ёки “Snapdragon 660” процессорларидан қайси бирини ўрнатиш кераклиги юзасидан фойдаланувчилар фикрини ўрганмоқда.
Xiaomi Redmi Pro 2 алоқа воситасининг 5,5 дюймли дисплей ҳамда сиғими 4 500 мА соат бўлган аккумулятор билан таъминланади.
Смартфоннинг муҳим ўзига хос жиҳати — унинг камераси бўлиб, бу гал ишлаб чиқарувчи қўш эмас, битталик, аммо ўта сифатли камера модулини жорий қилади. Маълум бўлишича, бу Sony’нинг 12 Мп сиғимли IMX362 сенсори. У Dual Pixel фокуслаш технологиясига эга. Ушбу модул яқинда тақдим қилинган Lenovo’нинг Moto G5 Plus телефонида ҳам ўрнатилган.
Инсайдерлар такомиллашган гаджетнинг нархини аллақачон маълум қилиб бўлишган. Унга кўра, Xiaomi Redmi Pro’нинг кичик — 4 Гб тезкор ва 64 Гб доимий хотира талқини $231, юқори — 6/128 Гб хотира талқини эса $260 доллардан сотувга чиқарилади.
