Яна бир хитойликнинг iPhone 7’си портлаб кетди
Мобил алоқа воситаларининг ўз-ўзидан ёниб кетиши одатий ҳолга айланди. Афтидан, бу яқин келажакда ҳам бартараф этиш амримаҳол бўлган жиддий муаммога ўхшайди. Гап Samsung эмас, iPhone 7 хусусида бормоқда. Бу гал хитойлик фойдаланувчи аёлнинг айфони ўз-ўзидан иккига бўлинган ва уни яралашига бир баҳя қолган.
Хитой нашрлари томонидан куйган iPhone 7 ва унинг фойдаланувчисининг суратлари эълон қилинмоқда. Фойдаланувчининг сўзларига кўра, жабрдийда аккумуляторни қувватлаш учун смартфонни электр токи манбаасига улаганидан бир неча дақиқа ўтиб, гаджет портлаган ва бўлакларга бўлинган.
Маълум бўлишича, бу iPhone 7 тўрт ой аввал сотиб олинган бўлган. Apple’нинг Хитойдаги бўлинмаси қурилманинг “оригинал”лигини тасдиқлаган.
Хитойда iPhone 7 портлаши билан боғлиқ ҳолат 2016 йилнинг ноябр ойида ҳам содир бўлган. Ўшанда Apple’нинг бу флагмани хитойлик фойдаланувчининг қўлида портлаган ва эгасини жароҳатлаган. Бунгача iPhone 6 Plus’нинг ёниб кетиши ҳолатлари ҳам бир неча маротаба кузатилган.
