Замонавий флагманларнинг ярим нархидаги OnePlus 3 тақдим этилди
2014 йил – Galaxy S5 ва iPhone 6 кучли смартфонлари мобиль алоқа бозорига кириб келган бир вақтда хитойлик номи чиқмаган компания OnePlus One’ни уларнинг “кушандаси” сифатида бозорга олиб чиқди. Аввалига кўпчиликнинг кулгусига сабаб бўлган бўлса ҳам, OnePlus One 2014 йилнинг энг мувафаққиятли смартфонига айланди.
Куни кеча, 14 июнь куни OnePlus компанияси тақдим қилган OnePlus 3 смартфони ҳам замонамизнинг энг кучли флагман смартфонларига қарши майдонга чиқди. Ва компания бу гал ҳам инсоф доирасида инновацион гаджетни 399 АҚШ долларига баҳолади.
OnePlus 3 алюминий корпусли смартфон бўлиб, унинг бўйи 152.7 мм., эни 74.7 мм., қалинлиги 7.35 мм., оғирлиги эса 158 грамм.
Гаджетнинг ягона плитали, ясси шаклдаги корпуси устига 5.5 дюймли Full HD сиғимли (1080×1920 пикселли), Optic AMOLED технологияда ишлаб чиқарилган дисплей ётқизилган. Дисплей Corning Gorilla Glass 4 юпқа шиша қатлами билан ҳимояланган.
6 ГБ тезкор хотира ва кучли Snapdragon 820 процессори унинг самарали фаолияти учун жавоб беради. Шунингдек, мобиль алоқа воситасининг доимий ички хотирасининг сиғими 64 ГБ.
OnePlus 3 Android 6.0.1 операцион тизимининг мослаштирилган OxygenOS операцион тизимида фаолият кўрсатади.
OnePlus 3’да олинган сурат
Унинг бош камерасида LED фоточақноғига эга 16 МП (Sony IMX 298), олд камерасида 8 МП сиғимли суратлар олиш мумкин. Бош камерада тасвирни оптик барқарорлаштириш, фазали автофокус функцияси мавжуд. Унда 4K сиғимли видео ёзиш мумкин.
3000 мА соат электр токи сиғимига эга аккумулятор “Dash Charge” тезкор қувватлаш технологиясига эга бўлиб, ярим соатда 60 фоизга тўлади. Ҳатто ўйин ўйнаётган ёки видео томоша қилиш жараёнида шу ҳолатда қувват олади. Қурилма бу жараёнда қизиб кетмаслиги учун хавфсизлик чоралари кўрилган.
Гаджет корпусида 3.5 мм аудио порт, USB Type-C туридаги тезкор қувватлаш порти, бармоқ излари сканери (дисплейдаги меню тугмасига жойлаштирилган), яқин масофада туриб алоқа ўрнатиш (NFC) технологияси каби сўнгги инновациялар жорий қилинган.
OnePlus 3 OnePlus’ компанияси веб-сайтида $399 доллардан, яъни шу имкониятларга эга флагманларнинг ярим баҳосида сотилмоқда.
