Apple қуввати бир ойга етувчи «дунёдаги энг зўр профессионал ноутбук»ни тақдим этди!

13 ноябрь куни Apple компанияси янги – 16 дюймлик MacBook Pro лаптопини расман намойиш қилди. Корпорация уни «дунёдаги энг зўр профессионал ноутбук», демоқда.

ЎҚИНГ: Самолётларга MacBook Pro олиб чиқиш тақиқланди

Экран

Янги девайс диагоналига 16 дюймлик IPS дисплей билан жиҳозланган, унинг тасвир аниқлиги 3072х1920 пикселни, зичлиги 226 пикселей/дюймни ташкил этади. Томонлари ўзаро 16:10 нисбатли экраннинг ёрқинлиги 500 кд/м² бўлиб, P3 тизимида кенг ранглар қамровига эга.

Ромлари юпқалиги эвазига, дисплейни 16 дюймгача катталаштирганда ҳам ноутбук ўлчамлари 15 дюймлик моделники даражасида сақлаб қолинган.

Клавиатура

Apple ниҳоят клавиатуранинг «капалак» механизмидан воз кечди, у тугмачаларнинг «илашиб» қолишига ва синишига олиб келарди. Айни шу сабаб билан кўплаб судларда жавоб беришига тўғри келган бўлса-да, корпорация мазкур механизмни яхшилай олмади. Охир-оқибат янги ноутбукида клавишларни ўрнатишнинг анъанавий «қайчили» механизмига таянган. Бундан ташқари, Apple’нинг таъкидлашича, энди клавиатурани буткул очиб ташламасдан, балки фақат синиб қолган тугмачанинг ўзини алмаштириш мумкин.

MacBook Pro анъанавий Touch Bar сенсор панелини сақлаб қолган. Ундан ўнг томонда Touch ID сканери, чапда эса – Esc тугмачаси ўрин олган. Force Touch трекпади ҳамда Apple T2 Security хавфсизлик чипини ҳам таъкидлаб ўтиш ўринли.

ЎҚИНГ: Peakago – атиги 300 долларлик, энг митти ноутбук-планшет! (+видео)

«Ички дунёси»...

Янги ноутбукнинг аппарат таъминоти асосини 6 ёки 8 ядроли, 9-авлод Intel Core i7 ёки Core i9 процессорлари ташкил этади. Уларда видеохотираси 8 гигабайтгача бўлган AMD Radeon Pro 5300M ёки 5500M график тезлатгичлари қўлланган.

Тезкор хотираси 16 гигабайт, доимийси эса 512 гигабайт ва 1 терабайтлик вариантларда. Бундан ташқари, MacBook Pro тарихида илк бор 8 терабайтлик SSD-хотира ўрнатиш имкони тақдим этилган.

Иннайкейин-чи?

Булардан ташқари, MacBook Pro олтита динамик, яхшиланган совитиш тизими, тўртта Thunderbolt 3 (USB-C) порти ҳамда қулоқчин учун 3,5 миллиметрлик аудиотирқиш билан жиҳозланган. Гаджетга симсиз интерфейслардан Wi‑Fi (802.11ac) ҳамда Bluetooth 5.0 жорий этилган.

16 дюймлик MacBook Pro аккумулятори 100 Вт/соатлик бўлиб, Apple’нинг даъвосича, унинг тўлиқ қуввати 11 соат ишлашга ёки кутиш режимида нақ 30 кунга етади!

ЎҚИНГ: Алданиб қолманг: ноутбукни очмасдан батареясини текшириш усуллари

Нархига келсак...

Янгиланган MacBook Pro баҳоси 2399 АҚШ долларидан бошланади. Бу нарх эвазига 6 ядроли 9-авлод Intel Core i7 процессори, AMD Radeon Pro 5300M видеокартаси, 16 ГБлик тезкор хотира ва 512 ГБлик ички SSD-хотирага эга ноутбук олиш мумкин. Айтиш керакки, унинг 15 дюймлик модели ҳам шунчага баҳоланган эди.

Ўртача конфигурацияли модели эса 8 ядроли Intel Core i9, AMD Radeon Pro 5500M, 16 ГБлик тезкор ва 1 ТБлик SSD-хотирага эга бўлиб, 2799 долларга тушади. Энг илғор версиясининг «оперативка»си нақ 64 ГБгача, доимий хотираси эса 8 ТБгача боради! Табиийки, нархи ҳам шунга яраша – 6099 доллар!

Apple аллақачон бу маҳсулоти учун олдиндан буюртма ола бошлаган, дўконларга эса янги MacBook Pro шу ҳафтада чиқади. Харидорлар унинг кул ранг ва кумушранг корпусли вариантларидан бирини танлашлари мумкин.

Terashop.uz интернет-дўконимизда эса атиги 2 535 000 сўмдан бошланувчи нархларда ASUS, Acer, Apple, Lenovo, HP ва Dell ноутбукларини сотиб олиш мумкин.

ЎҚИНГ: Apple асосчиси ўзининг энг севимли гаджетини айтди – бу iPhone эмас!