Galaxy S11+ нинг аккумулятор сиғими қанча бўлади?
Samsung'нинг навбатдаги флагман линейкаси — Galaxy S11 ҳақида маълумотлар сиздирилишда давом этмоқда. Булардан энг янгиси S11+ нинг аккумулятор сиғими борасидаги хабардир.
Маълум қилинишича, 2020 йилги флагманларнинг энг премиуми анчайин катта — 5 000 мА/соат сиғимли аккумуляторга эга бўлади. Қуйидаги расмда келтирилган аккумулятор EB-BG988ABY модель рақамига эга бўлиб, бу S11+ нинг ўтган ой Geekbench'да ошкор бўлган SM-G988 модель рақамига мос келади. Бу ҳақида қатор манбаларга таяниб, GSMArena сайти хабар бермоқда.
Корейсча ёзувлардан яна кўриниб турибдики, аккумулятор энг ками 4 855 мА/соат ва одатий 5 000 мА/соат сиғимга эга бўлади. Бу Samsung'нинг смартфонлари орасидаги энг катта сиғимлардан бўлиб, S10+ нинг 4 100 мА/соатидан анча каттароқдир.
Ҳозирда корейс компаниясининг фақат Galaxy M20 ва M30 смартфонлари 5 000 мА/соат сиғимли аккумуляторга эга бўлса, M30s'га бундан-да катта — 6 000 мА/соатли қувват йиғгич ўрнатилган.
Катта аккумулятор Galaxy S11+ нинг 6.9 дюймли Dynamic AMOLED экрани остига бемалол сиғиши керак.
Қурилманинг ҳозиргача маълум бўлган бошқа жиҳатлари қаторига 120Hz янгиланиш частотасига эга экран; Snapdragon 865/Exynos 990 чипи; 12ГБ гача тезкор, 512ГБ доимий хотира омбори; 108 мегапикселли асосий, 5 карра зумли перископ камера киради.
