iPhone 9’нинг илк суратлари ва видеоси: сканер экраннинг ўзида!
Apple компанияси ўтган йили iPhone 8 ҳамда iPhone 8 Plus моделларидан ташқари, ҳеч ким кутмаган хусусиятларга эга iPhone X – юбилей айфонини ҳам тақдим этди. Бу билан, корпорациянинг моделлар қаторидаги урфдан чекиниш ҳосил бўлди: аввал ҳар йили навбатдаги рақамли айфон, кейин эса шу муайян рақамли смартфоннинг номида «S» бўлган, нисбатан илғор талқини чиқарилар эди. 2017 йилда бу анъана бузилганини инобатга олиб, купертинолик гигантнинг навбатдаги телефони iPhone 9 модели бўлишини тахмин қилиш мумкин.
ЎҚИНГ: iPhone 9 учун аккумуляторларни LG Chemical етказиб беради
Жаҳон оммаси iPhone X суперфлагманига кўникиб бўлганини инобатга олсак, «олмали» корпорация энди бозорга унинг яхшиланган талқинини тақдим этиши ва бу iPhone 9 модели бўлиши эҳтимоли юқори. Science and Knowledge дизайнерлар гуруҳи бу смартфон ҳақидаги турли миш-мишларга, фойдаланувчиларнинг ундан кутаётганларига асосланиб, мазкур қурилманинг концептини яратди. Натижада эса ҳаммани ҳайратга солувчи ажойиб смартфон модели юзага келди, деб ёзади AKKet нашри.
Мана, аввалига видеолавҳада уни батафсил томоша қилайдик-да:
Суратлардан ҳамда видеолавҳадан кўринадики, iPhone 9 модели ташқи кўринишидан iPhone X дизайнини эслатади, аммо айрим фарқлар мавжуд. Бўлажак флагман корпусининг орқа қопқоғи, аввалги моделдагидек, шишадан ишланган. Камеранинг қўш объективи эса, юбилей айфонидан фарқли равишда, асосий корпус юзасидан туртиб чиқиб турмайди.
Смартфоннинг олд юзаси эса кучли ўзгарган, чунки Apple «ўйиқ»ли Super Retina дисплейидан воз кечиб, бу моделда классик тўртбурчак матрица қўллаган. Бу шаклда контентни акс эттириш учун майдон кўпроқ экани фойдаланувчига қулайлик келтиради. iPhone 9 экранининг юқори қисмида аввалгидек қиёфа сканери жойлашган, аниқроғи, бу – Face ID’нинг яхшиланган талқинидир. У янада тезкорроқ ва аниқроқ ишлайди.
Шунингдек, дизайнерларнинг фантазиясига кўра, янги айфонда бармоқ изи сканери дисплейнинг ўзига интеграция қилинади.
Эслатиб ўтамиз, купертинолик гигант iPhone X моделида юз сканерини татбиқ этиш эвазига дактилоскопик датчикдан воз кечган эди. Бироқ, Science and Knowledge дизайнерлари фикрига кўра, доимий ишқибозларининг ва кенг жамоатчиликнинг фикрини инобатга олиб, Apple ушбу модулни iPhone моделига қайта жорий этади. Лекин у энди аввалгидек Touch ID эмас, балки Display ID деб аталади.
Бошқа хусусиятларига келадиган бўлсак, iPhone 9 смартфони диагонали 5,5 дюймли OLED-экран, 6 ядроли Apple A12 процессорига эга. Унинг тезкор хотираси 4 гигабайт, доимий флеш-хотираси эса 128/256 гигбайт ҳажмли талқинларда чиқарилади. Қўшалоқ асосий камераси 12, олд камераси бўлса 8 мегапикселли. У симсиз алоқанинг Wi-Fi 802.11ad (янги стандарт) ҳамда Bluetooth 5.0 интерфейсларини қўллаб-қувватлайди.
Манбанинг тахминига кўра, iPhone 9 смартфонининг базавий модификацияси 1000 АҚШ долларидан ошиқ қийматга эга бўлади.
ЎҚИНГ: Samsung, Apple, Xiaomi ва Huawei ҳар бир смартфондан қанча соф даромад кўради?
Яна бир бор эслатиб зтамиз – юқоридаги маълумотлар Science and Knowledge дизайнерларининг фантазияси маҳсулотидир. Apple 2018 йили тақдим этадиган смартфон хусусиятлари бундан фарқ қилиши мумкин.
