ЭКСКЛЮЗИВ ВИДЕО: ҳашамдор Galaxy X8 (2018) смартфони тўлақонли юз сканери билан дунёни лол қолдиради!

DiMaX
2730
27.12.2017 13:46

2017 йилда Apple корпорацияси тақдим этган қойилмақом iPhone X смартфони бетакрор, олд панелни деярли буткул қоплаб олган ромсиз OLED-экрани билан ҳайратларга сазовор бўлди. Шунингдек, бу суперфлагман инсон юзининг 3D-моделини яратувчи тўлақонли юз сканери билан жиҳозланган илк мобил қурилма ҳамдир. Агарда «олмали» компаниянинг смартфон, планшет ва ноутбуклар борасида янги урфларни бошлаб берувчи эканини ҳисобга олсак, 2018 йили бошқа компаниялар ҳам iPhone X услубидаги смартфонларини тақдим этишлари турган гап. Жумладан, шулардан бири купертинолик корпорациянинг асосий рақобатчиси – жанубий кореялик техногигантнинг Samsung Galaxy X8 (2018) модели бўлиши мумкин.

ЎҚИНГ: Huawei P11 нафақат уч модулли камерага, балки iPhone X’даги яна бир «фишка»га ҳам эга бўлади

Science and Knowledge нашри журналистлари тахминига кўра, келаси йили Samsung компанияси iPhone X’даги кўпгина жиҳатларни ўзида жамлаган ва ҳатто ундан ҳам илгарилаб кетган Galaxy X8 (2018) смартфонини тақдим этиши мумкин.

Бўлажак смартфоннинг рендер-суратларини тарқатган манбага кўра, Samsung Galaxy X8 (2018) смартфонининг ромсиз Super AMOLED-экрани диагоналига 5,8 дюймлик катталикда бўлади. Юқори қисмида Face ID юз сканери учун «ўйиқ» қолдирилган дисплейининг тасвир аниқлиги эса QHD+ форматида, яъни 2960х1080 пикселга тенг. Мазкур қурилма 2,8 ГГц такт частотасида ишловчи, 8 ядроли илғор Qualcomm Snapdragon 845 процессори билан жиҳозланади. Унга яна Adreno 630 график тезлатгичи, 6 гигабайтлик тезкор ҳамда 64 гигабайтлик доимий хотира ўрнатилади. 19 мегапикселлик қўшалоқ асосий камераси, 16 мегапикселли олд камераси ҳамда иккинчи авлод USB Type-C порти ҳам бу девайснинг илғор жиҳатлари қаторидадир.

Samsung Galaxy X8 (2018) корпуси ҳозиргача бозорга тақдим этилганлари орасида энг мустаҳками бўлмиш Corning Gorilla Glass 5 шишасидан ясалади. Гаджетнинг муҳим хусусиятларидан бири – унда Synaptics тақдим этган бармоқ изи сканери экраннинг ўзига жойланади.

ЎҚИНГ: Бармоқ изи сканери экраннинг ўзига жойланган илк смартфон тақдимотига атиги бир ой қолди!

Шунингдек, энг қизиқарли «фишка»ларидан яна бири iPhone X суперфлагманидаги Face ID аналоги – тўлақонли юз сканери бўлади. 2018 йилнинг иккинчи ярмида тақдим этилиши тахмин қилинаётган Galaxy X8 (2018) орқа панелида объективлари ёнма-ён жойлашган асосий камера ўрин олади.

Техник таъминотига келсак, бу смартфон Wi-Fi 802.11ad (янги стандарт), Bluetooth 5.0, NFC, FM-радио ва албатта 4G VoLTE модулларига эга. Корпуси IP68 стандарти бўйича чанг ва сувдан ҳимояланган бўлиб, икки метргача чуқурликдаги сув остида бир соатгача зиёнсиз қола билади.

Мана, эҳтимолий смартфонни видеода томоша қиламиз:

Кўриниб турибдики, агарда чиндан ҳам шу кўринишдаги ва юқоридагидек тавсифларга мос Samsung Galaxy X8 (2018) бозорга чиқса, бутун дунёни лол қолдириши аниқ. Ҳозирча эса булар шунчаки концепт мақомида бўлиб, дизайнерларнинг фантазияси, холос.

Лекин бир замонлар симсиз телефоннинг ўзи ҳам шунчаки бир фантазия бўлган-ку, тўғрими? Тугмачасиз телефон чиқарилганида эса, ҳатто технологик компаниялар ҳам унинг устидан кулишган...