Meizu «селфибоп» юбилей смартфонларининг тақдимот кунини айтди
Ўз қурилмаларида ажойиб сифат ва нарх уйғунлигини таъминлай олган хитойлик компания – Meizu бу йил ўн беш йиллигини нишонламоқда. Шунга бағишлаб у Meizu 15 смартфонлар туркумини тақдим этишни режалаштирган.
ЎҚИНГ: Meizu'нинг юбилей смартфони iPhone X'дан зўр!
Meizu 15 смартфонлари ҳақида деярли ҳамма маълумотлар, ҳатто уларнинг «жонли» суратлари ҳам чиқиб бўлган. Ҳатто бу туркум билан бир қаторда, ундан кейинги авлод – Meizu 16 туркуми флагманлари ҳам тайёрланаётгани маълум.
Эслатиб ўтамиз, юбилей смартфонлари туркуми Meizu 15, Meizu 15 Plus ҳамда Meizu 15 Lite моделларидан иборат. Булардан дастлабки иккитаси Snapdragon 660 базасида ишлайди ва тегишлича 5,5 ҳамда 6 дюймлик экранлар билан таъминланади.
ЎҚИНГ: Meizu’нинг юбилей смартфони ҳам уч хил версияда чиқади!
Куни кеча маълум бўлишича, ушбу смартфонлар сериясининг тақдимот тадбири 22 апрелга белгиланган. Бу ҳақдаги расмий тизер Хитойнинг Weibo ижтимоий тармоғида тарқатилган.
Ушбу маълумотни тарқатган манбанинг таъкидлашича, Meizu 15 туркумидаги ҳар учала смартфон нақ 20 мегапикселли олд камера билан таъминланган. Бу эса замонавий фойдаланувчиларнинг, айниқса селфи олишни хуш кўрувчи ёшларнинг талаб ва истакларига мос келиши табиий.
Meizu 15 смартфонларининг бозорга қачон чиқарилиши ва нархи ҳақида ҳозирча аниқ маълумот йўқ. Лекин унинг сотувга чиқарилган кўплаб моделлари Ўзбекистон бозорларида ҳам топилади.
