Microsoft аллақачон «жанозаси ўқилган» Windows 7’ни кутилмаганда бепул янгилаяпти!

Хабарингиз борки, Microsoft корпорацияси жорий йилнинг 14 январь куни Windows 7’нинг истеъмолчиларга мўлжалланган версиясини қўллаб-қувватлашни расман тўхтатган. Лекин мазкур операцион тизим талқинининг «жанозаси ўқилган» бўлса-да, уни буткул «дафн этиш»га ҳали эрта экан.

ЎҚИНГ: Путин хавфли операцион тизим ишлатиши маълум бўлди

Хулласи калом, Microsoft кутилмаганда Windows 7 учун яна битта бепул апдейт чиқаришини эълон қилди, деб ёзади The Verge нашри. Бироқ буни фойдаланувчилар учун туҳфа дегандан кўра, ўз айбини ёпиш деб аташ тўғрироқ бўлар эди.

Гап шундаки, компания шу йилнинг бошида Windows 7 учун сўнгги – KB4534310 рақамли янгиланишни тарқатган эди. Бироқ ушбу апдейтни ўрнатиб олган фойдаланувчилар ундаги хатоликлардан шикоят қила бошлашди. Жумладан – ўрнатилган обойлар ўрнига қоп-қора фон пайдо бўлиб қолган.

Microsoft узоқ вақт бу борада бирор изоҳ бермасдан келиб, ниҳоят, мазкур камчиликларни бартараф этувчи янгиланиш чиқаришини айтди. Шу тариқа, корпорация миллионлаб фойдаланувчилар ҳалиям ишлатиб келаётган Windows 7’нинг «сўнгги нафас олиши»га имкон бермоқда.

ЎҚИНГ: 2019 йили «раҳматли» бўлган саккизта технология (+видео)