Қойилмақом Galaxy Note 9’ни видеода кўрамиз!
Жанубий кореялик техногигантнинг бу йил февралда тақдим этган Galaxy S9 ҳамда S9+ моделлари унинг ўзи учун ҳам, фойдаланувчилар учун ҳам кутилган натижани бермади. Бу қурилмалар Samsung фанатлари орзиқиб кутган технологияларга эга бўлмай чиқди, тағин уларнинг савдоси кўнгилдагидек кетмаётгани эса компанияга хуш келмаяпти.
ЎҚИНГ: Galaxy S9’ни хитойлик смартфон GeekBench’да мағлуб этди (+«жонли» сурат)
Шундан келиб чиқиб, таҳлилчилар битта фикрни илгари сураётирлар: Samsung энди бор кучини «янги умид» – Galaxy Note 9 фаблетига сарфлайди. Шундай тахмин билан айрим дизайнерлар мазкур қурилманинг концепт суратлари ва ҳатто видеороликларини ҳам тайёрлашмоқда. Шулардан бири – DBS DESIGNING компанияси тақдим этган концепт анча қизиқарли чиққан.
Уларнинг фикрига кўра, мазкур фаблетнинг тўққизинчи авлод вакилининг корпуси Galaxy Note 8 моделидан ҳам кўра «қўполроқ», думалоқланмаган бурчакларга эга бўлади.
Смартфоннинг орқа томонида ўзгариш бўлади – дактилоскопик датчик у ерга жойланмайди. Дизайнерларнинг тахминича, Galaxy Note 9 моделида бармоқ изи сканери олд панелга кўчирилади. Бу эса, ушбу фаблетда мазкур сенсор бевосита дисплейнинг ўзига интеграция қилиниши ҳақидаги сўнгги миш-мишларга ҳамоҳангдир.
Айтиш керакки, жанубий кореяликларнинг кутилаётган фаблети ҳам Galaxy S9 моделида қўлланган процессорга таянади. Буни яқинда Geekbench сервисида ўтказилган тест натижалари ҳам тасдиқлаб турибди.
ЎҚИНГ: Samsung ҳам шошиб қолди: Galaxy Note 9 аллақачон бенчмаркда «кўринди»!
Гапнинг қисқаси, Galaxy Note 9 самарадорлиги учун, қайси бозорга тақдим этилишига қараб, Qualcomm Snapdragon 845 ёки Exynos 9810 процессори масъул бўлади. Тезкор хотирасининг ҳажми 6 гигабайтни ташкил этувчи ушбу гаджет Android операцион тизимининг 8.1 – Oreo талқини бошқаруви остида ишлайди.
Мана, Samsung Galaxy Note 9 смартфони учун DBS DESIGNING дизайнерлари тақдим этган концепт-видеони томоша қиламиз:
Ўз анъанасидан бироз чекинган ҳолда, Samsung ушбу фаблетини августнинг бошида, ёки ҳатто июлнинг охирроғида ҳам тақдим этиши мумкин. Жанубий кореялик корпорация бу билан икки жиҳатдан ютади. Аввало, кўнгилдагидек сотилмаётган Galaxy S9 ўрнига бу фаблет яхшироқ даромад келтира бошлайди. Қолаверса, Galaxy Note 9 «ашаддий рақиб»нинг кейинги авлод iPhone’ларидан олдин савдога чиқарилиб, бозордан ўз улушини олишга кўмаклашади.
ЎҚИНГ: iPhone билан рақобатлашиш учун Galaxy Note 9’ни муддатидан олдин чиқаришмоқчи
