Видеода инфографика: Ўтаётган ўн йилликда қайси смартфонлар оммабоп бўлди?
Аввалроқ биз The Verge нашри охирги ўн йилда пайдо бўлган, инсоният учун катта аҳамият касб этган девайсларнинг юзталик рейтингини чиқаргани ҳақида ёзгандик. Сўнг эса АҚШнинг нуфузли Time журнали ҳам ўн йилликда тақдим қилинган ўнта энг муҳим қурилмани эълон қилган.
ЎҚИНГ: Ўн йилликнинг энг зўр ўйинлари иккита рейтингда!
DataLearn номли YouTube-канал эса шу муддатда турли брендларнинг смартфонлари оммабоплиги қанчалик ўзгарганини акс эттирувчи инфографика-видео тайёрлади. Уни кўриб, 2010 йилнинг апрелидан то 2019 йилнинг октябрига қадар етакчи смартфонсозларнинг оммабоплиги қай даражада алмашиб борганини яққол англаш мумкин.
Гувоҳи бўлаётганингиздек, салкам 10 йил аввал дунё смартфон бозорининг етакчиси Nokia компанияси эди. Унинг ҳиссаси 37,5% бўлса, иккинчи ўриндаги Apple смартфон бозорининг 33,15% қисмини эгаллаган. Кучли учликни 15,86% улуш билан Blackberry якунлаб берган бўлса, Samsung ҳиссаси атиги 2,37% бўлган.
ЎҚИНГ: 2019 йилнинг энг сара саккизта смартфони (IGN версияси)
Бироқ шу ўн йил ичида вазият тубдан ўзгарган – 2019 йилнинг якунига келиб Samsung етакчиликни қўлга олди – ҳозирда смартфон бозорининг 31,49 фоизи унинг маҳсулотларидир. Apple иккинчи ўринни сақлаб қола олди, унинг бозордаги ҳиссаси эса 22,09 фоизга тенг.
Ундан кейин эса охирги йиллардагина юқорига кўтарилиб олган учта хитойлик – Huawei, Xiaomi ва Oppo компаниялари (тегишлича 10%, 7,79% ва 4,1% улуш билан) келяпти.
Қизиғи, ўн йил аввалги етакчилар – Nokia ҳам, Blackberry ҳам бугунги кунда смартфонсозларнинг топ-ўнталигида йўқ.
ЎҚИНГ: ТОП-10: Дунёдаги энг харидоргир смартфонлар (2019 йил, декабрь)
