Хитойлик икки талаба қалбаки iPhone’лар билан Apple’ни салкам миллион долларга туширди!

АҚШнинг Орегон штатидаги коллежда ўқийдиган икки нафар талаба ўзига хос усулда купертинолик корпорацияни лақиллатиб келганлиги аниқланди. Энди уларни жуда катта миқдордаги жарима ҳамда бир неча йиллик қамоқ жазоси кутмоқда.

ЎҚИНГ: Хитойлик харидорлар узоқ йиллар Apple’ни лақиллатиб келишган экан!

Хабарларга кўра, Янгянг Жоу ҳамда Куан Жианг исмли хитойлик талабалар 2017 йилдан бери Apple’нинг турли сервис марказларига жами 1493 та iPhone’ларни топширишган. Турли моделлардаги ушбу смартфонларнинг битта «айби» бўлган – улар «ўз-ўзидан ёнмай қолган». Компания эса уларни ўша моделлардаги оригинал айфонларга бепул алмаштириб бераверган. Қўлга киритилган оригинал iPhone’ларни эса талабалар ўз юртларига жўнатишган – Хитойдаги жиноий шериклар смартфонларни сотиб беришган.

Гап шундаки, улар топширган смартфонлар аслида Хитойда ишлаб чиқарилган қалбаки моделлар бўлган. Оригинал iPhone’ларга ташқи кўриниши жуда ўхшаш, вазни бир хил бўлган бу қурилмалар ёқилмаганлиги боис, сервис марказларида уларни текшириб бўлмас эди. Ички қисмларини кўриш учун эса корпусни очиш керак бўлади – бу ишни фақат Apple заводидагина қилиш мумкин.

Шу тариқа, бу икки «шоввоз» купертинолик корпорацияга жами 900 минг АҚШ доллари миқдорида зарар етказган. Охири улар қўлга тушгач, барчасига ойдинлик киритилган. Энди Янгянг Жоу ҳамда Куан Жианг ўз юртига депортация қилиниши, суд қарорига кўра етказилган зарарни қоплаб бериши кутилмоқда.

ЎҚИНГ: iPhone: асл ва қалбаки маҳсулотни фарқлашга оид маслаҳатлар