LeEco тақдим қилган янги смартфонлар Apple’ни доғда қолдирди
Хитойнинг LeEco компанияси смартфон саноатига кириб келганига кўп бўлмаган бўлса ҳам, бу йўналишда жиддий муваффақиятларга эриша олди. Аввалига USB Type-C портларини ишлаб чиқариш билан шуғулланган бўлса, кейинчалик компания илк маротаба Qualcomm Snapdragon 820 процессорида ишлайдиган смартфонни тақдим қилган эди.
Бугун, 20 апрель куни компания биратўла Le2, Le2 Pro ҳамда Le Max 2 деб номланган янги смартфонлар туркумини эълон қилди. Табиийки, бу гал ҳам мазкур гаджетлар барчани ҳайратига сабаб бўлди.
Гап шундаки, мазкур смартфонларнинг ҳеч бирида 3,5-мм аудио қулоқчинларга мўлжалланган коннектор порти мавжуд эмас. Ҳа, гарчи бу технологияни Apple татбиқ қилиши мумкинлиги сўнгги ойларда айтиб келинаётган бўлса ҳам, биринчи бўлиб уни LeEco смартфон саноатида синаб кўришга эришди. Энди наушникларни бу портга эмас, балки универсал USB Type-C коннекторига улаб, аудио файлларни тинглаш, суҳбатлашиш мумкин.
Компания ҳатто мазкур портга тушадиган аудио қулоқчинларни ҳам тайёрлашга улгурган. Аҳамиятли жиҳати бу қулоқчинлар компаниянинг ўзи яратган Continual Digital Lossless Audio стандартига мос келади.
Смартфонларнинг ўзига хос бошқа жиҳатлари ҳам бор, албатта. LeEco Le2 гаджети Full HD форматидаги тасвир намойиш қиладиган 5.5 дюймли экранган эга. У 32 ГБ доимий хотира билан таъминланган.
Смартфоннинг қувват тоши – аккумуляторнинг электр токи сиғими 3000 мА соат. Le2 10 ядроли тезкор MediaTek Helio X20 процессори, 3 ГБ тезкор хотира билан мақтаниши мумкин.
Гаджетнинг муҳим жиҳати бўлмиш камераларининг пиксель сиғими ҳам юқори бўлиб, унга 16 МП бош ва 8 МП олд камералар ўрнатилган.
5.5 дюймли Le2 Pro смартфони эса янада самарали ишлаш кўникмасига эга Helio X25 процессори билан таъминланган. Унинг экрани 2560 x 1440 пиксель сиғимига эга. Гаджетнинг оддий талқини 3 ГБ тезкор хотира ва 16 МП бош камера ҳамда махсус талқини 4 ГБ тезкор хотира, 21 Мп бош камера билан “қуроллантирилган”.
LeEco Le Max 2 смартфони эса “акалари”дан фарқли равишда, 5.7 дюймли бўлиб, QHD технологиясида ишлаб чиқарилган экран сиғими 2560 x 1440 пикселга тенг. У Snapdragon 820 процессорига эга. Шунингдек, мазкур гаджетнинг 16 МП сиғимли камераларида оптик барқарорлик функцияси ўрнатилган. Смартфоннинг тезкор хотираси 6 ГБ, доимий хотираси эса 64 ГБ ни ташкил қилади. Флагманнинг аккумулятор сиғими 3100 мАс.
LeEco ҳар учала мобиль қурилмаларни металл корпусда ишлаб чиқармоқда ва уларда бармоқ излари сканери ҳам татбиқ қилинган.
Хитойда смартфонлар 26 апрель куни сотувга чиқади ва LeEco Le2 смартфонини Хитой бозорига 200 АҚШ долларидан, Le2 Pro гаджетини эса 230 АҚШ долларидан, Le Max 2 мобиль қурилмасини эса 385 АҚШ долларидан сотувга чиқариш мўлжалланмоқда. Қурилмаларнинг 6 ГБ тезкор ҳамда 64 ГБ доимий хотирага эга энг илғор талқинларининг нархи тахминан 500 АҚШ долларигача кўтарилади.
