2017 йил бошида Android Gingerbread ва Honeycomb’да Google Play сервислари тўхтатилади
Google Play сервислари Android операцион тизимида ишлайдиган қурилмалардаги иловаларни янгилашга хизмат қилади. Google Play сервисларисиз иловалар ишлашдан тўхтаб қолиши мумкин.
Шу йилнинг октябрь ойида Google мазкур сервиснинг ҳалигача Android Gingerbread ва Honeycomb версияларини қўллаб-қувватлайдиган 10.0.0 рақамли сўнгги версиясини чиқарган. Android Developers блогида ёзилишича, кейинги йилнинг бошида чиқариладиган 10.2.0 версияси эса фақат Android 4.0.1 Ice Cream Sandwich ва ундан янгироқ тизимларга мўлжалланади.
IXBT нашрида келтирилган сўнгги статистикага кўра, Android 2.3 Gingerbread жаҳондаги Android дастурида ишлайдиган 1,3% қурилмалардагина мавжуд. Android 4.0.1 Ice Cream Sandwich версияси ҳам худди шундай улушга эга. Мазкур версиялар мутаносиб тарзда 2010 ва 2011 йилларда чиқарилган эди. Бироқ ҳозирча Android 4.0.1 Ice Cream Sandwich дастурида Google Play сервисларини қўллаб-қуввтлаш давом эттирилади.
