DxOMark энг янги ва арзон iPhone камерасига ҳукм ўқиди

DxOMark энг янги ва арзон iPhone камерасига ҳукм ўқиди

DxOMark iPhone SE смартфонининг асосий ва селфи камераларини синовдан ўтказиб, натижаларни эълон қилди.

iPhone SE'нинг камера аппарат таъминоти iPhone XR'ники билан бир хил. 12 мегапикселлик датчик f/1.8 апертура, фазани аниқловчи автофокус, OIS ва 5 каррагача оптик зумга эга. Бугунги кунги талабларга кўра, бу жуда ҳам содда таъминотдир.

Селфи камера эса f/2.2 апертура ва қўзғалмас фокус линзасига эга 7 мегапикселлик датчик.

Умумий олиб қараганда, iPhone SE экспозиция ва контрастни ўлчаш борасида жуда яхши натижа қайд этди. Бунга Apple'нинг автоматик HDR'ини сабаб қилиб кўрсатиш мумкин. Автоматик HDR ҳам бино ичкарисида, ҳам ташқарида расм олишда яхши ишлайди, қора ва сояли майдонларни ҳам сифатли экпозиция қилади.

iPhone SE камерасининг кучли томони тасвир ранги бўлди. DxOMark қурилма рангга яхши баланс бериши ва тасвирларнинг тўйинганлик даражасини мақтамоқда.

Автофокус ҳам кучли, тез ва барқарор ишлайди. Аммо тасвир хиралиги смартфоннинг кучсиз жиҳати. Ҳозирда бошқа компаниялар ҳатто буджет смартфонларига ҳам каттароқ резолюцияли камера қўйиб, пиксел биннинг техникаси ёрдамида тасвир хиралигини камайтирмоқда, паст ёруғликда олинган тасвирлар сифатини оширишга эришмоқда. Расм хиралиги ва деталларнинг камлиги, айниқса, ичкарида олинган ёки юқори контрастли суратларда кўзга ташланади.

Асосий ва селфи камераларда олинган портретларни яхши (аммо аъло эмас), деб баҳолаш мумкин. Смартфонда махсус Тунги режим мавжуд эмаслиги унинг камчиликларидан.

Шундай қилиб, DxOMark Apple iPhone SE (2020) смартфонига умумий ҳисобда 101 балл, селфилар учун эса 84 балл берган.

Синов натижалари билан батафсил бу ерда танишинг (ҳавола саҳифа матни инглиз тилида).

ЎҚИНГ: «Жонли» тест видеоси: iPhone автономлиги ва тезкорлигига iOS 14 қанчалик таъсир кўрсатган?

Сайтимизнинг энг чиройли расмларини Инстаграмдаги саҳифамизда томоша қилинг!