Galaxy S7 смартфони iPhone’нинг кушандасими?
Ҳаммасига эртага – 21 февраль куни Барселонадаги Жаҳон мобиль конгрессининг расмий очилишидан бир кун аввал ўтадиган мобиль компанияларнинг намойишлари ва тақдимотлари чоғида ойдинлик киритилади.
Эртага намойиш этилиши кутилаётган Galaxy S7 ва Galaxy S7 edge қурилмалари ҳақида бизга ҳозирча маълум сўнгги маълумотларни тақдим этамиз.
Кўпчиликнинг фикрича, Galaxy S7 2016 йилнинг энг яхши “ақлли телефон”и бўлиши мумкин. Сўнгги йилларда мобиль қурилмалар савдосида бозори чаққон кореялик компания янги воситани 2015 йилнинг “қаҳрамони” Galaxy S6’да аниқланган қуйидаги камчиликларни бартараф этиб, янги лаёқат ва ўзига хос жиҳатлар билан бойитган.
Компания қурилмаларда ниҳоят қўшимча хотира картасини мустақил ўрнатиш имконини берувчи microSD бўлмачаси учун жой ажратмоқчи. Энди уларга каттароқ хотира флешкасини ўрната оламиз. Яъни, смартфонлар 200 ГБ ҳажмгача бўлган хотира картасини қўллаб-қувватлаши мумкинлиги тахмин қилинмоқда.
S6 ва S6 Edge’нинг бўлинмас қувват тоши – аккумулятори кўпчиликнинг норозилигига сабаб бўлган эди. Уларнинг қувват ҳажми ҳам нисбатан кичикроқ – 2500-2600 мАс эди. Навбатдаги мобиль алоқа воситаларининг аккумулятори 3000-3600 мАс ҳажмидаги электр токи сиғимига эга бўлса ажаб эмас. Яъни, энди Samsung’нинг янги қурилмаларидан икки соат кўпроқ фойдаланиш мумкин. Айниқса, соҳил экранларига эга S7 Edge учун қўшима қувват – бу фойдаланувчининг хотиржамлигини таъминлайди.
Android 6.0 Marshmallow операцион тизимида ишлайдиган ушбу қурилмаларнинг суратга олиш кўникмалари ҳам ошди. Galaxy S6’да суратларни қайта ишлаш ва уларнинг сиғимини камайтириш функцияси мавжуд эди. Янги галжетларнинг паст ёруғликда сифатли суратга олиш, тезкор ҳаракатларни ҳам тиниқ муҳрлаш кўникмалари ҳақида ижобий фикрлар юрибди.
Қурилма камераси корпус сирти билан шу қадар омухтаки, қобиқда на камера объективкаси ва на бошқа қурилма бўртмаси мавжуд эмас – корпус жуда силлиқ. Ҳатто, iPhone 6S ҳам бу каби нафис дизайнга эга эмас.
Турли вазият ва иловалардан фойдаланишда қурилма дисплейининг сезувчанлигини ошириш ёки камайтириш мумкин. Бу Apple’нинг “ақлли соат”ларидаги 3D touch технологияси, яъни экранни керагида енгил ёки қаттиқ чертиш технологиясига ўхшаб кетади.
Galaxy S7’да аудио қулоқчинлар учун 3.5 мм порт мавжуд. Агар Apple бу аудиога мўлжалланган портни USB порт билан бирлаштирадиган бўлса, кўпчилик iPhone фойдаланувчилари аналог адаптерларни топиш ёки Bluetooth технологияси асосида аудио тинглашга мажбур бўлишини тақозо қилади. Натижада, бу йилги рақобатда Samsung’нинг қўли баланд келиши мумкин.
