Инсайд: Samsung Galaxy S8 Edge сурати кўрсатилди

Galaxy Note7 билан содир бўлган ҳодисадан кейин, Samsung компанияси навбатдаги флагманни чиқариш муддатларига ўзгартириш қилиши кутилган эди. Бироқ соҳа инсайдерларининг фикрига кўра, Samsung Galaxy S8 флагмани 2017 йилнинг февраль ойида Барселонада ўтказиладиган MWC кўргазмасида тақдим этилиши мумкин, деб хабар бермоқда hi-tech.mail.ru.

Хусусан,  Galaxy S8 Edge моделининг илк рендери Хитойнинг Weibo микроблогида эълон қилинган. Албатта, ҳозирча бунинг сохта маълумот эканлиги ҳам истисно қилинмаяпти. Рендарда Samsung Galaxy S8 Edge смартфонига  худди аввалги флагман каби икки томондан Edge  экран ва орқа тарафда иккита камера ўрнатилган. Энг қизиғи, модель ташқи тарафдан Huawei Mate 9 қурилмасини эсга солади.

Экран остидаги Home тугмаси олиб ташланган. Экран атрофидаги рамкалар янада ингичкалашган.

Эслатиб ўтамиз, аввалроқ мазкур модель Snapdragon 835 процессорида ишлайдиган илк флагманлардан бўлиши ҳақида сайтимизда хабар берган эдик.