Кореянинг ўзида 1 млн дона Galaxy S8’нинг аввалдан буюртма қилиниши кутилмоқда
Galaxy S8 ҳозирги кунга қадар Samsung тақдим қилган смартфонлар ичида жамоатчилик орасида қисқа фурсат ичида жуда катта эътиборни қозонган мобил алоқа воситаси сифатида тарихда қоладиган кўринади. Кореялик нашрларнинг 10 апрел куни ёзишларича, Samsung янги флагманларга аввалдан буюртма олишни бошлаганидан 4 кун ўтиб, 550,000 та Galaxy S8 буюртма қилинган. Samsung компниясининг тасдиқлашича, 5-куни буюртмачилар сони 600,000 тадан ошиб кетган.
Samsung 11 апрел куни флагманларга берилган буюртмалар сонига аниқлик киритди. Маълумотларга кўра, ҳозиргача жами 620,000 дона 5.8 дюймли Galaxy S8 ҳамда 6.2 дюймли Galaxy S8’га аввалдан тўловлар қилинган. Шунингдек, 150 минг дона 6 ГБ тезкор хотира ва 128 ГБ доимий хотира талқинидаги махсус Galaxy S8+ смартфонига буюртма берилган.
Мазкур кутилмаган қизиқишдан Samsung шошиб қолаётгани йўқ ва жамоатчиликнинг сўнгги “гелекси”га бўлган эҳтиёжи ўз вақтида қондирилишини маълум қилган. Экспертларнинг фикрича, Жанубий Кореяда йиғилаётган Galaxy S8 смартфонига буюртма бериш суръати шу тахлит давом этса, 21 апрелга, яъни аввалдан буюртма бериш муддати тугагунигача Кореянинг ўзида 1 миллион дона Galaxy S8 мобил аппаратига буюртма берилади.
