Microsoft Surface Pro 4 “Энг яхши мобиль планшет” учун мукофотни қўлга киритди
Microsoft Surface Pro 4 Жаҳон мобиль конгресси 2016 анжумани доирасида ўтказилган “Глобал Мобиль мукофот” тақдирлаш маросимида энг яхши мобиль планшет сифатида эътироф этилди.
Win Beta нашрининг ёзишича, бу йўналишда мукофотни қўлга киритиш учун Surface Pro 4 таблет бозоридаги жиддий рақиблари – Apple iPad Pro, iPad Mini 4, Samsung Galaxy Tab S2 9.7 ва Sony Xperia Z4 каби планшетлар билан курашган.
2015 йилда ўтказилган мазкур мукофотда ҳам унинг “аждоди” Surface Pro 3 планшети худди шу йўналишда ғолиб бўлган эди.
Компания ушбу планшетни “Катта ишларни қилиш учун ўз қоидаларингдан воз кечишинг керак. Шу сабабли ҳам, биз Surface Pro’ни яратдик. Ҳаммасини бизнинг планшет билан кашф қилинг.” деган шиор остида тақдим қилган эди. Surface Pro 4 планшети 2736х1824 пиксел, 12.3 дюймли дисплейга эга.
Surface Pro 4’нинг Intel Core M3 процессор, 4 ГБ тезкор хотира, 128 ГБ қўшимча хотирага эга талқини 179 АҚШ доллари, шунингдек Intel Core i5 процессорга эга талқини $899 АҚШ доллари, 16 ГБ тезкор ва 256 ГБ қўшимча хотира, Intel Core i7 процессорига эга талқини $1,699 АҚШ долларида сотувга чиқарилган.
Планшет энига 292.1 мм, бўйига 201.42 бўлиб, қалинлиги 8.45 мм. У процессорининг русумига кўра, 766, 786 грамм вазнга эга.
