Смартфонни битта қўлда бошқариш учун қулай меню – Swiftly Switch
Катта ўлчамли смартфонлар даврида уларни битта қўлда бошқариш қийин, айниқса, кафтингиз кичкинароқ бўлса. Аксига олиб, смартфонлардаги бошқариш унсурлари экраннинг тепасида (ҳолат қатори) ҳамда пастида (навигация тугмачалари) жойлашган.
Бироқ энди бу муаммони ҳал этувчи илова – Swiftly Switch ишлаб чиқилди. Уни қурилмангизга ўрнатиб олгач, сиз иккинчи қўлни ишга солмасдан туриб ҳам смартфон экранида исталган ҳаракатни бажара оласиз. Бунинг учун Swiftly Switch экранга махсус доирасимон меню қўшиб қўяди; уни эса бош бармоғингиз билан экраннинг ўнг чеккасидан ўртага суриш орқали чақирасиз.
Swiftly Switch доирасимон менюси иккита даражадан иборат. Биринчи даражадаги белгичалар орқали айни дамда ишлаётган иловалардан истаган бирига ўтишингиз мумкин.
Агарда бош бармоғингизни экран четидан суриб сал узоқроққача олиб борсангиз, унда Swiftly Switch иккинчи даража – навигация тугмачаларини чиқариб беради. Улар ёрдамида осонлик билан бир қадам орқага қайтиш, иш столига ўтиш, билдиришномалар панелини очиш ва бошқа амалларни бажариш мумкин. Қулай жиҳати – мазкур тугмачалар таркиби ва жойлашувини созласа бўлади. Демак, уларга айнан сизга кўп керак бўладиган ҳаракатларни боғлаб қўйишингиз мумкин.
Шунингдек, илова созламалари орқали бошқа жиҳатларини ҳам ўзгартира оласиз. Масалан, экраннинг қаерига тегинганда Swiftly Switch менюси чақирилишини, унинг ташқи кўринишини, жумладан, ранги ва шаффофлик даражасини созласа бўлади.
Swiftly Switch дастури бепул бўлиб, у Android 4.4 ва ундан кейинги версиялардаги смартфонларда ишлайди. Бироқ илованинг айрим опциялари, масалан – экраннинг турли чеккаларида ҳар хил менюлар чиқариш кабилар блокланган. Уларнинг барчаси ишлаши учун эса тўлиқ версиясини харид қилишга тўғри келади. Бепул версиясини мана бу ҳавола орқали қурилмангизга ўрнатиб олишингиз мумкин.
