Ўзбекистонлик фотографнинг суратлари Буюк Британия қироличасини ҳайрон қолдирди
Podrobno.uz сайтининг маълум қилишича, жорий йилда Dinara&Co медиа компанияси томонидан нашр этилган “Ўзбекистонга ташриф буюриш учун 10 та сабаб” номли ўзига хос китоб Англиянинг Букенгем саройи ва шахсан қиролича Елизавета Иккинчининг эътиборини қозонди. Ҳатто нашриётга қиролича вакилининг халқлар ўртасида маданий муносабатларни ривожлантириётгани учун миннатдорчилик ифода этилган мактуби юборилган.
Коллекцион китоб шу йилнинг июн ойида инглиз ва рус тилларида чоп этилган, ҳозирда Тошкент ва Лондондаги дўкон ва санъат галереяларида сотилмоқда. Тақдимотдан кейин Европанинг бир қатор нуфузли нашриёт уйлари китобни чоп этиш ва тарқатиш истагини билдиришган. Dinara&Co компанияси 2016 йилнинг август ойида ушбу китобнинг нусхасини махсус чарм ғилофда Англия қироличасига туҳфа қилган эди.
“Ўзбекистонга ташриф буюриш учун 10 та сабаб” китоби халқаро миқёсда Ўзбекистоннинг сайёҳлик нуфузини ошириш мақсадида яратилган. Мазкур тўпламдан ўзбекистонлик машҳур фотограф Эрнест Куртвелиевнинг 15 йил давомида тасвирга туширган 250 тадан ортиқ бадиий фотографиялари ўрин олган.
