Xiaomi оммабоп смартфонларидан бирининг Lite версиясини чиқаряпти

Xiaomi ўтган ноябрь ойида Mi Note 10 смартфонини чиқарган эди. Афтидан, компания қурилманинг Lite версиясини ҳам тайёрлади.

Модель рақами M2002G4LG бўлган Mi Note 10 Lite Таиланднинг NBTC сертификатлаш агентлиги листингига киритилди. Бундан тушуниш мумкинки, тақдимот жуда яқин.NBTC веб-сайтида қурилманинг техник жиҳатлари ошкор қилинмаган, аммо смартфон ўтган ой FCC'дан ўтган ва у ҳақда маълумотлар пайдо бўлганди.

Mi Note 10 каби Mi Note 10 Lite ҳам Snapdragon 730G чипида ишлайди, дисплей эса 6.47 дюймли FullHD+ AMOLED панель. Аккумулятор 5 260 мА/соат сиғимга эга ва 30 ваттда тезкор қувватланади. Булар — янги қурилманинг Mi Note 10 билан ўхшаш жиҳатлари.

Xiaomi FCC'га топширган ҳужжатдан маълум бўлишича, Mi Note 10 Lite бешта камерали модулга эга бўлади: 64МП, иккита 8МП, битта 5МП ва битта 2МП линзалар. Смартфонда лазерли автофокус мавжуд эмас.

Xiaomi'нинг ўзи ҳозирча Mi Note 10 Lite ҳақида расмий маълумот берганича йўқ, аммо тез кунларда компаниядан хабарлар кутиб қоламиз.

ЎҚИНГ: Xiaomi Mi Note 10 ва унинг Pro талқини намойиш қилинди!