Аҳамиятига кўра Google асосчиларидан кейинги ўринда турувчи раҳбар уни буткул тарк этди

Google компаниясида унинг муассислари – Сергей Брин ҳамда Ларри Пейдж асосий ўрин тутиши шубҳасиз. Компанияда ўз аҳамиятига кўра улардан сўнг техник маслаҳатчи – Эрик Шмидт турар эди. Маълум бўлишича, шу кунларда у қидирув гигантидан бутунлай ишдан кетган.

ЎҚИНГ: "Okay, Google: Менга ўзинг ҳақингда гапириб бер!"

Google асосчилари Эрик Шмидтни компанияга 2001 йили чақириб олишган эди. У ўшанда янги компаниянинг директорлар кенгаши раиси лавозимини эгаллаган ва корпоратив инфратузилма қурилиши билан шуғулланган.

Эрик Шмидт аста-секинлик билан технологик гигантнинг бевосита бошқарувидан четлаша борган. 2011 йили эса у Google бош ижрочи директори лавозимини Ларри Пейджга бўшатиб берган. Собиқ раҳбар кейинчалик қидирув гигантининг бош тузилмаси – Alphabet холдинги таркибига ўтказилган. Энди эса Шмидт у ерни ҳам буткул тарк этди.

Шмидт журналистларнинг саволларига жавоб беришда ўта ҳақгўйлиги билан танилган. Жумладан, 2009 йили, «Шахсий маълумотларимизни Google билан баҳам кўраверсак бўладими?» деган саволга шундай жавоб берган: «Агар бу маълумотдан бошқа бировлар хабардор бўлишини истамасангиз, буни қилмаганингиз маъқул».

Яна бир қизиқ факт: Google’га ишга олишда номзодларга бериладиган синов саволига Эрик Шмидт жавоб бера олмаган! Бу қизиқ савол тўғрида мана бу хабаримизда батафсил ўқиб олишингиз мумкин.

ЎҚИНГ: Android борасида Samsung’нинг энг улкан хатосини биласизми?