Андижонда интернетдан ғаразли мақсадда фойдаланганлар жазоланди
Андижон шаҳар Маиший хизмат касб-ҳунар коллежида Жиноят ишлари бўйича вилоят суди раиси ўринбосари Адҳамжон Мирзаев раислигида сайёр суд бўлиб ўтди. Унда, жумладан, интернетдан ғаразли мақсадда фойдаланган шахсларнинг жиноий иши кўриб чиқилди, дея хабар беради Ўзбекистон Миллий ахборот агентлиги.
ЎҚИНГ: Ўзбекистонлик Facebook фойдаланувчиси бўҳтони учун жиноий жавобгарликка тортилади
Андижон шаҳри Майдонбозор маҳалласида яшовчи Н.В. эндигина 27 ёшни қаршилаган. У ёш бўлса ҳам, шаҳридаги корхоналардан бирида бўлим бошлиғи вазифасида ишлайди. Унинг юриш-туришига кўпчиликнинг ҳаваси келади. Бироқ...
Бироқ у интернетда – Тelegram мессенжерида «Билло Воҳидов» профилини очиб, диний ақидапарастлик ғоялари билан йўғрилган махсус маърузани «Doʻstlarim» номи билан ташкил этилган виртуал гуруҳ аъзоларига тарқатган. Бу ҳаракати билан юртимиздаги кўплаб ёшларнинг онгини заҳарлашга уринган.
Андижон тумани Янгиобод маҳалласида яшовчи Ж.Қ. эса қирқ ёшни қоралаган, уч фарзанднинг отаси. У ҳам ўзининг уяли телефони ҳамда компьютер орқали «оdnoklassniki.ru» ижтимоий тармоғида ўзига нотаниш профиль эгаларидан бири билан дўстлашади. Танишиш-ку ёмон иш эмас, лекин нотаниш профиль эгаси томонидан юборилган «жиҳод» ва «шаҳид»ликка даъват қилувчи, диний ақидапарастлик ғоялари билан йўғрилган аудио ва видео маърузаларини тинглаб, уларни «Дўстлар» гуруҳидаги шахсларга тарқатган.
Суд ҳукмига кўра, уларнинг ҳар иккаласига беш йил озодликдан маҳрум қилиш жазоси тайинланди. Лекин суд инсонпарварлик тамойилларини, уларнинг ўз қилмишларидан пушаймонлигини инобатга олиб ҳамда маҳалла фуқаролар йиғини, ота-оналари кафиллиги билан жазони шартли деб белгилади, уларга 3 йил синов муддати берилди.
Маҳалла фуқаролар йиғинлари, кенг жамоатчилик вакиллари, ўқитувчи ва ўқувчилар иштирокида бўлиб ўтган сайёр судда юқоридаги каби хатти-ҳаракатларнинг аянчли оқибатлари, жамиятга, айниқса, ёшлар тарбиясига салбий таъсири, шунингдек, ёшларнинг интернет тармоғидан оқилона фойдаланишлари, бузғунчи ғояларга эргашмаслик хусусида фикр-мулоҳазалар билдирилди. Ёшларнинг уяли телефон ва компьютерда фойдаланишларини ота-оналар, ўқитувчилар доимий назорат қилиб боришлари зарурлиги айтиб ўтилди.
Сайёр суд мажлисида ҳуқуқшунослар фуқаролар, ёшларнинг ҳуқуқий билим ва саводхонлигини юксалтириш, қонун устуворлигини таъминлаш, турли иллатларга барҳам бериш, жиноят ва ҳуқуқбузарликлар келиб чиқишининг олдини олиш бўйича суҳбатлар ўтказди.
ЎҚИНГ: Ўзбекистонда VPN ва Proxy’дан фойдаланганлик учун жазо белгиландими?
