Apple 5G’да ишлайдиган iPhone яратишга киришди
Apple алоқанинг 5G симсиз технологиясини синаб кўришни бошлади. iPhone смартфонига мўлжалланган тармоқ мобил алоқада юқори тезликда маълумот алмашиш имконини беради. Бу тўғрида Business Insider нашри хабар бермоқда.
АҚШнинг Федерал алоқа комиссияси (FCC) Apple’нинг millimeter wave номли янги симсиз технологияни синаб кўриш бўйича берган аризасини эълон қилди. Бу технологиянинг “5G” алоқа тармоғининг муқобили экани айтилмоқда. Янги алоқа тармоғи кейинги авлод симсиз интернет хизматларини кўрсатишга мўлжалланган.
Rusbase нашрига кўра, Apple тажриба доирасида Wi-Fi сигналини сониясига 1 гигабайт тезлигида қабул қилиш технологиясини ишлаб чиқишни мақсад қилган Starry стартапини амалга оширади. Илк тажриба жараёнлари Купертинода бўлиб ўтади. Бу тажриба жараёнлари узоғи билан 1 йил давом этади.
Apple’нинг маълум қилишича, лойиҳа давомида мобил алоқа станциясининг тўлқин тарқатиши ва уни шу диапазонда қабул қилаётган қурилманинг сигнални қабул қилиш самарадорлиги яқиндан ўрганилади. Ўрганишлар чоғида тўпланган маълумотлар 5G технологиясида ишлайдиган қурилмани яратиш учун асос бўлади.
Юқори частота ва қисқа тўлқин эвазига 5G технологияси маълумотлар ўтказиш тезлигини ошириб, узилишларни бартараф қилади. Шунингдек, бундай алоқага мўлжалланган қурилмаларда антенна ҳажмини мустақил белгилаш ҳам мумкин.
