Apple бу медиа-гигантни сотиб олса, бу — инсоният тарихидаги энг йирик молиявий битим бўлади
Apple корпорацияси фаолиятини янада кенгайтириш мақсадида, шу кунларда Голливуддаги Disney киностудиясини харид қилишни режалаштириб юрибди. Ушбу битимнинг камида $230 млрд долларга имзоланиши кутилмоқда. Insider.pro таҳлилчиларига кўра, бу харид Голливуд ҳамда Кремний водийсининг, жаҳон кино саноатининг келажагини батамом ўзгартириб юборади.
Баҳоси 700 млрд АҚШ долларини ташкил қилувчи “Олма”нинг 100 йиллик тарихга эга “медиагигант”ни сотиб олиши технология сектори ҳамда кўнгилочар саноат тарихи, қолаверса асримизнинг энг улкан хариди бўлиши мумкин.
Disney Apple’га нега керак?
Корпорация бугун даромадининг 60 фоизини iPhone савдосидан олади. Жаҳон мобил саноатидаги ўсиш, янги рақибларнинг пайдо бўлаётгани компанияни янги соҳаларда ўзини синаб кўришга мажбур қилмоқда. Мисол учун, Apple Music хизматини ривожлантириш учун Apple бир оз аввал бир неча млрд доллар эвазига мусиқий компанияларни сотиб олган эди. Disney эса улкан медиа контент ва кўплаб медиа-каналларга эга компания. Уни сотиб олиш ва ривожлантириш Apple’га медиа саноатда, телеузатишда Netflix ва Amazon каби брендлар устидан осонгина ғалаба қозониш имконини беради.
Қолаверса, Apple асосчиси — Стив Жобс ўз навбатида Disney таркибидаги Pixar студиясининг бош акциядорларидан бири бўлган. Таҳлилчиларнинг фикрича, сайёрамизнинг йирик бизнес-конгломератларининг бирлашуви, йирик молиявий ҳамда техник имкониятларнинг кенгайиши IT-саноати ҳамда кўнгилочар тармоқни бирлаштириб, мобил медианинг янги тарихини бошлаб беради.
