Apple мобил қурилмаларининг 87 фоизига iOS 10 ўрнатилган

Apple компанияси ўзининг дастурчилар учун мўлжалланган расмий сайтида iOS мобил платформасининг оммабоп версиялари ҳақидаги маълумотни эълон қилди.

2017 йил 28 июль ҳолатига кўра, App Store онлайн-дўконига кирган Apple мобил қурилмаларининг 87 фоизи янги iOS 10 бошқаруви остида ишлаган.

Айни вақтда, барча iPhone, iPad ва iPod Touch’ларнинг 10 фоизи iOS 9 да, қолган 3 фоизи эса iOS’нинг ундан-да эскироқ версияларида ишлаши маълум бўлди.

iOS 10’нинг тақдимоти 2016 йил 13 сентябрида бўлиб ўтган эди. Версия энди чиқарилган вақтда фойдаланувчилар баъзи ноқулайликлар дуч келган, бироқ Apple тезда муаммоларни бартараф этган.

Таққослаш учун, 2016 йил августида чиқарилган Android’нинг сўнгги версияси — Android Nougat ҳозирда Android-қурилмаларнинг фақат 11,5 фоизини қамраб ололган, холос.