Apple’нинг iPhone 8 сотиш режаси 95 млн донага ошди

Осиёнинг бизнес, молия-иқтисод йўналишига ихтисослашган нуфузли Nikkei нашрининг ишончли манбаага асосланиб ёзишича, Apple компанияси ҳозирча Samsung Electronics билан жуда катта миқдорда OLED матрицали экрани сотиб олиш бўйича шартнома имзолаган.

Айфон моделининг 10 йиллиги муносабати билан чиқарилиши кутилаётган iPhone 8’нинг савдосидан Apple’нинг умиди катта. Келишувга кўра, Samsung 2017 йил охиригача ўзининг америкалик рақибига 95 млн дона OLED-панелли дисплей етказиб бериши керак. OLED панелли дисплейлар бугунгача айфонда фойдаланиб келинган IPS туридаги экранга нисбатан ёрқин ва кам қувват ейиши Apple’га маъқул келган кўринади.

Эслатиб ўтамиз, ҳисоб-китобларга кўра, Apple корпорацияси 2016 йилда халқаро смартфон бозорига 50 миллион дона iPhone 7 сотишга ҳам муваффақ бўлган. iPhone 7 Plus эса бир йил орасида 25 миллион маротаба харид қилинган. “Олма”нинг 2018 йил давомида 100 миллион донага яқин айфон сотишни кўзлаётгани, экспертларнинг фикрича, унинг ўта илғор мобил алоқа воситасини тайёрлаётганининг белгисидир.