Apple ўзининг бу йилги WWDC конференцияси қачон ўтказилишини расман эълон қилди

Google'нинг I/О (10 май), Microsoft'нинг эса Build (23-24 май) тадбирларидан кейин Apple'нинг ҳам дастурчилар учун мўлжалланган WorldWide Developer Conference (WWDC) конференциясининг бу йилги сони қачон ўтказилиши расман эълон қилинди – купертинолик компания ўзининг WWDC23 тадбирини 5 июндан 9 июнга қадар ўтказади.

Ҳар доимгидек, асосий воқеалар 5 июн куни бўлиб ўтади. Очилиш маросимида Apple ўзининг янги авлод iOS (17), iPadOS (17), macOS (14), watchOS (10) ва tvOS (17) операцион тизимларини тақдим қилади. Қолган кунларда эса дастурчилар ва талабалар учун қўшимча тадбирлар бўлиб ўтади.

Таъкидлаш жоизки, Apple сўнгги йилларда WWDC давомида ўзининг янги қурилмаларини ҳам намойиш қилишни одат қилди ва биз бу йил ҳам янги Mac Pro, MacBook Air компютерлари ва эҳтимол, анчадан бери миш-миш қилиб келинаётган АR/VR қурилмаси билан танишишимиз мумкин бўлади.

WWDC23 тадбирини, албатта, Apple'нинг расмий саҳифаларида жонли тарзда онлайн томоша қилишингиз мумкин бўлади. Шунингдек, дастурчилар ва талабалар 5 июн куни Apple Park'да асосий тадбирни шахсан бориб кўришлари ва тўлиқ кун давомида ўтказиладиган бошқа турли тадбирларда қатнашишлари мумкин бўлади.