Apple тажрибали дизайнеридан айрилди

Apple`нинг эски дизайнерларидан бири Дениэл «Денни» Костер (Daniel «Danny» Coster) корпорацияни тарк этди. У компания раҳбарлигига Стив Жобс қайтганидан сўнг бренднинг муваффақиятли тижорий маҳсулотлари — iPhone смартфонлари ҳамда iMac G3 компьютер-моноблокининг яратилишида ҳал қилувчи ролларни бажарган эди.

Костер GoPro компаниясида дизайн бўйича вице-президент лавозимида фаолият кўрсатадиган бўлди. Шу муносабат билан эълон қилинган пресс-релизда келтирилишича, у GoPro`нинг қурилмалардан тортиб, дастурий таъминот ҳамда хизмат кўрсатишгача бўлган барча фаолият йўналишларининг дизайн томонини белгилаб беради.

Янги зелландиялик Денни Костер Apple`га 1994 йилнинг ёзида келган эди. 20 йилдан зиёдроқ вақт мобайнида компаниянинг 600 дан зиёдроқ патентига муаллифлик қилди ва ушбу русум остида ишлаб чиқариладиган қатор қурилма ва аксессуарларнинг ишлаб чиқарилишига катта ҳисса қўшди. iPhone 4 смартфони ва iPad учун симсиз клавиатуралар шулар жумласидан. Унинг ишлари бир қатор халқаро дизайнерлик ташкилотлари томонидан энг яхши деб тан олинди.

Денни Костер ва GoPro раҳбари Ник Вудман (Nick Woodman) 2001 йилнинг декабрида Вудман Мексика пляжларидан бирида ўзининг илк экшен-камераси прототипини синовдан ўтказаётган вақтда танишган.