Apple ўз уйида смартфон бозоридаги етакчиликни Samsung’га бой берди

2016 йилнинг илк чораги Apple компанияси учун қанчалар оғир келган бўлса, Samsung учун шу қадар омадли бўлди. Америка смартфон бозорида купертинолик “Олма”га 7 ой илгари бой берилган етакчилик байроғи ниҳоят яна кореялик гигант компания тасарруфига ўтди.

Гонгконглик таҳлилчиларнинг фикрича, март ойида  АҚШда сотилган смартфонларнинг 28 фоизи Samsung’нинг, 23 фоизи Apple’нинг улушига тўғри келмоқда.

Мазкур муваффақиятда осиёлик ишлаб чиқарувчининг Galaxy S7 ҳамда S7 edge смартфонлари муҳим роль ўйнагани қайд этилмоқда. Натижада, компаниянинг даромади 2016 йилнинг шу даврига қадар 12 фоизга ошган.

Apple’нинг тахмин қилганидек, сўнгги айфон қурилмаси бўлган iPhone SE компания даромадларига ижобий таъсир ўтказа олмади.

Иккала компания ҳам рақобатда бир-биридан бўш келмаслик учун навбатдаги флагманлар (iPhone 7 ҳамда Samsung Note 6) устида изланишлар олиб боришмоқда.

Америка смартфон бозорида навбатдаги ўринга LG Electronics компанияси даъво қилмоқда. Ҳозирча компания ўз кўрсатгичларига сўнгги G5 смартфонининг савдосини қўшмаганини айтган.

АҚШ смартфон бозорида Хитой компанияларининг улуши ҳам ўсиб бормоқда. Хусусан 4-ўринда турган ZTE сотилган смартфонларнинг 6.6 фоизига эгалик қилади. Ундан сўнг Франциянинг Alcatel компанияси 4.5 фоизлик улуш билан турибди.

Март ойида АҚШда сотилган смартфонларнинг 1 фоизи Хитойлик ишлаб чиқарувчи Huawei ҳиссасига тўғри келади.