Apple забт этиш арафасидаги улкан чўққи
Купертинодаги “Кремний водийси”да жойлашган машҳур Apple корпорацияси акцияларининг умумий қиймати, яъни корпорациянинг умумий баҳоси 2017 йилнинг 8 майида $800 млрд долларга етиб, корпорация жаҳондаги энг қиммат акционерлик компаниясига айланди.
Айни пайтда Apple $153.44 доллар қийматига эга 5.214 млрд дона акцияни муомалага чиқарган. Сўнгги вақтларда Apple акциялари мунтазам қимматлашиб бормоқда. Мисол учун, таниқли миллиардер Уоррен Баффетнинг Berkshire Hathaway компанияси Apple учун тиккан сармоясини 4 маротабага кўпайтириб олган.
Таҳлилчиларнинг фикрича, жорий йилнинг сентябрида тақдим қилиниши кутилаётган янги айфон модели Apple корпорациясига компания тарихидаги энг йирик даромадни келтирган гаджетга айланади. Натижада, йил охирига қадар ҳар бир акция баҳоси $202 долларга кўтарилади ва бу кўрсаткичнинг $1 трлн. долларга етиши кутилмоқда. Бу сайёрамиздаги энг қиммат — “триллион доллар”лик жамоат компаниясининг пайдо бўлишига замин яратади.
